Литература

Година на јазиците на УНЕСКО, Година на македонскиот јазик и Меѓународниот ден на мајчиниот јазик,е се одбележа   во изложбениот салон на НУБ „Св. Климент Охридски“ во Скопје. Со овој проект Универзитетската библиотека се вклучува во одбележувањето на Меѓународниот ден на мајчиниот јазик на светско ниво. Покрај Меѓународниот ден на мајчиниот јазик, на 26 септември се одбележува и Денот на европските јазици. Во 1998 година влезе во сила Европската повелба за заштита на регионалните и на малцинските јазици со која, исто така, се нагласува лингвистичката разновидност и повеќејазичноста.

ОДБЕЛЕЖАН СВЕТСКИОТ ДЕН НА МАЈЧИНИОТ ЈАЗИК

Неопходна е поголема грижа за јазикот

Во светот на секои 15 минути исчезнува по еден јазик, па затоа поколенијата треба да водат поголема грижа за својот мајчин јазик, рече Бошески

 Младите поколенија треба да го чуваат и да го негуваат мајчиниот јазик зашто тој е единствена жива врска на многу генерации на македонскиот народ, рече меѓу другото Миле Бошески, директор на Националната и универзитетска библиотека „Св. Климент Охридски“ на вчерашното пригодно одбележување на Светскиот ден на мајчиниот јазик, 21 Февруари. Во Годината на јазиците на УНЕСКО и на македонскиот јазик, тој е категоричен дека е неопходна поголема грижа за јазикот зашто во светски рамки на секои 15 минути згаснува по еден јазик. Пред присутните книжевници, поети, студенти и ученици за значењето на Годината на македонскиот јазик зборуваше и Лилјана Поповска, претседателка на одборот кој ги координира активностите за одбележување и промоција на нашиот мајчин јазик кај нас и во светот. - Треба да се гордееме што старословенскиот е четврти јазик во светот на кој била преведена Библијата и дека тој е јазикот од кој потоа се раширила словенската писменост. На оние што не знаат треба да им кажеме дека потеклото на нивните јазици е од тука. Мора да бидеме достоинствени и мудри, и да не дозволиме на нашиот пат кон Европа некој да ни го негира јазикот, како што тоа сега се случува со нашето име. Македонскиот јазик е сврзно ткиво за сите нас што живееме тука и тој не' обединува да бидеме силна нација од луѓе што се разбираат меѓу себе - рече Поповска.Во рамките на одбележувањето на Денот на мајчиниот јазик и Светската година на јазиците, беа прочитани и две пораки што генералниот секретар на УНЕСКО, Коичиро Мацура, деновиве ги испрати до сите нации во светот. Под слоганот „Јазиците се важни“ во пораката на Мацура за мајчиниот јазик се вели дека тој е суштина за идентитетот на групи и поединци во светот, но и за мирен соживот. „ Јазиците претставуваат суштина за идентитетот и тие се стратешки фактор за напредокот. Јазиците се многу повеќе од поле за истражување на специјалистите, тие се срцето на целиот социјален, економски и културен живот“, се вели во пораката на Мацура.

Во пораката посветена на Светската година на јазиците, челникот на УНЕСКО ги повикува владите, нациите, граѓанските здруженија, образовните институции и сите други стручни здруженија да придонесат за почитување, промоција и за заштита на сите јазици, а особено на тие на кои им се заканува опасност од исчезнување.Во НУБ вчера беше поставена и изложба со странски дела , а ученици ја читаа и „Т’га за југ“ од Константин Миладинов на повеќе јазици.

Македонскиот јазик ќе биде презентиран во Александрија

Презентација на нашиот јазик ќе има и во познатата голема библиотека во Александрија во рамките на одбележувањето на Годината на македонскиот јазик, најави Поповска. Таа истакна дека преку нашата Универзитетска библиотека остварени се контакти со Александриската библиотека и дека се во тек преговори за одредување на терминот за наше презентирање таму. Се предвидува да се организираат трибини за нашиот мајчин јазик, за неговите корени, за историјата, а ќе бидат промовирани и повеќе наши книги што ќе бидат оставени во таа библиотека. - Презентацијата во Александрија ќе има големо значење во плановите за светско промовирање на нашиот јазик - вели Поповска.

(Т.О.)

 

Во НУБ „Св. Климент Охридски“ вчера беше одбележан Светскиот ден на мајчиниот јазик

Невена Поповска

Светот вчера го одбележа Меѓународниот ден на мајчиниот јазик, кој УНЕСКО го прогласи на 30-тата сесија на Генералната конференција во 1999 година. Во 2000 година 21 февруари е промовиран како Ден на лингвистичка и културна разновидност и мултилингвизам.

Република Македонија даде свој придонес во одбележувањето на Светскиот ден на мајчиниот јазик одбележувајќи го со пригодна програма која се одржа во просториите на Народната и универзитетска библиотека „Св. Климент Охридски“. Притоа беше прочитана пораката од генералниот секретар на УНЕСКО, Коичиро Мацура, во која меѓу другото се вели: „Јазиците претставуваат суштина за идентитетот на групи и поединци, но и за нивниот мирен соживот. Тие се стратешки фактор за напредокот кон одржлив развој и претставуваат хармонична поврзаност меѓу глобалното и локалното. Јазиците се многу повеќе од поле за истражување на специјалистите, тие се срцето на целиот социјален, економски и културен живот. Токму тоа е и значењето на слоганот на УНЕСКО за Меѓународната година на јазиците: „Јазиците се важни!“- укажува Мацура.

По повод одбележувањето на светскиот ден на мајчиниот јазик, поздравна беседа одржа директорот на НУБ „Св. Климент Охридски“, Миле Бошески, кој притоа истакна дека: „ Народот вели колку повеќе јазици знаеш, толку повеќе вредиш. Сите 7.000 јазици што се зборуваат во светот се важни, некои повеќе, некои помалку. За жал, статистиката вели дека на секои 15 дена згаснува по еден јазик. Затоа треба да се чува и негува мајчиниот јазик. Тој е единствената жива врска на многу генерации на македонскиот народ.“

Пред присутните беше интерпретирана култната песна „Т’га за југ“ од Константин Миладинов, која е присутна ширум светот во превод на 43 јазици, беше проследен и специјално подготвениот документарен филм за годината на македонскиот јазик, насловен, како „Македонскиот јазик во глобалниот свет“, а покрај пораките на директорот Бошевски и Коичиро Мацура на присутните им се обрати и Лилјана Поповска, претседател на програмско-организациониот одбор 2008 година на македонскиот јазик.

majcin.jazim.jpg