Свето Евангелие од светиот апостол Марко (зач. 18)

Рече Господ на Своите ученици: „Да минеме на спротивната страна!“ И кога го отпуштија народот, учениците Го зедоа со себе, како што беше во коработ, а го следеа и други кораби. И се подигна голема бура, и брановите се префрлуваа во коработ - така што тој веќе пропаѓаше. Он, пак, беше на кормилото и спиеше на возглавница; Го разбудија и Му рекоа: „Учителе, зар не Ти е жал што загинуваме?“ А кога стана, му забрани на ветрот и му рече на морето: „Молкни, престани!“ И ветрот стивна, и настана голема тишина. Па им рече: „Што сте така плашливи? Како немате толку вера?“ И ги опфати голем страв, и говореа еден на друг: „Кој е, пак, Овој, што и ветрот и морето Го слушаат?“