Годинешниот Симпозиум на нашето здружение на ликовните критичари АИКА Македонија ќе се одржи на 19.11.2024, вторник, 13.00 часот, во Националната галерија, објект Чифте амам.

Во почетниот дел од Симпозиумот, претседателката на АИКА Македонија, д-р Ана Франговска, ќе го отвори симпозиумот, со воведно излагање, истакнувајќи неколку важни аспекти од последните активности на меѓународната АИКА и АИКА Македонија. Таа ќе ја соопшти програмата на симпозиумот и накусо ќе проговори за важноста на овогодинешната тема. Како главен фокус на првиот дел од Симпозумот ќе го најави овогодинешниот добитник на наградата за ликовна критика „Ладислав Баришиќ“, Илија Прокопиев, да го презентира и одбрани истражувачкиот проект „Раскинување со уметноста (каква што ја знаеме).“

Главниот дел од ова издание на Симпозиумот ќе се осврне на темата: „Предадена или (оп)круж(е)на маса? Потрага по моделот: „Жива слика“ [tableau vivant] или гласот на критиката?“, конципирана и координирана од д-р Натали Рајчиновска Павлеска, член на АИКА Македонија. Оваа тема го истакнува развојот на пејзажот на уметничката критика генерално, па и кај нас и поканува богат дијалог за нејзината цел, модели и идни насоки.

Во описот на концептот д-р Рајчиновска Павлеска пишува:

           „Веројатно наједноставно би било да се потврди дека ликовната критика е дисциплина во изумирање, но се чини дека сè уште опстанува еден значаен сегмент во кој средствата за промоција на уметноста или алтернативниот „критички“ модел на уметноста во нејзините „критички“ облици не успева да ја отповика нужноста или, пак, да ја замени неопходноста од присуството и застапеноста на дневната или периодичната критика. Отсуството на критичките платформи, на стручните списанија и наменски публикации одново е повод да се продискутира предавањето–како–напуштање или опкружувањето–како–заобиколување на горливите теми поврзани со опстојувањето на критичкиот дискурс во неговите соодветни облици.

Оттука, дискурсот на годинешниот симпозиум се повикува на постојните „критики на критиката“ во поширок теоретски и практичен контекст, поставувајќи ги можните паралели за согледување на настанувањето и настојувањето на кризата и кај нас, преку обидите за лоцирање на специфичните причини за нејзиното т.н. „исчезнување“ додека (сè уште) постои“.

На симпозиумот како главни говорници со свои излагања на темата покрај координаторот, ќе се обратат и:

1. Викторија Васева Димеска со темата „Неколку цртички за ликовната критика“

2. Д-р Мелентие Пандиловски, „Уметничката критика во третата деценија на дваесет и првиот век“ и

3. Маја Чанкуловска - Михајловска, „Реконструкција или без систем?

(некои предлози за практични делувања)

По завршување на обраќањата на координаторот и говорниците кои ќе ја постават основата за дискутирање, ќе се иницира отворена и продуктивна дебата за изнаоѓање на вистински насоки за идно поактивно функционирање и на АИКА и на македонската критика воопшто.

Проектот е овозможен со поддршка на Министерството за култура и туризам и благодарение на соработката со Националната галерија.

Со Почит,

Ана Франовска

Претседател на АИКА Македонија

--
Ana Frangovska, curator
Оваа е-адреса е заштитена од спамботови. Треба да ви е овозможено JavaScript за да ја видите.
Оваа е-адреса е заштитена од спамботови. Треба да ви е овозможено JavaScript за да ја видите.
tel.: +38970574930