ГОЛЕМ НАСТАН ВО ОХРИД

Околу 150 Македонци од целиот свет од 31 јули до 7 август во Охрид ќе бидат дел од големата манифестација "Заедно дома во Македонија" - најспектакуларниот настан посветен на македонската дијаспора

Околу 150 Македонци од целиот свет од 31 јули до 7 август во Охрид ќе бидат дел од големата манифестација "Заедно дома во Македонија" - најспектакуларниот настан посветен на македонската дијаспора. Организатор на оваа манифестација, на која ќе се игра Светско првенство во фудбал за Македонците во светот, е Здружението на македонските иселеници "Корени".

- Станува збор за седумдневен настан, седум дена максимално исполнети со спорт, забава, промоција и презентација на Македонија пред македонските иселеници. Оваа идеја за остварување на контакт со Македонците во светот постоеше одамна, но сега се реализира, вели Миодраг Атанасиевски, претседател на "Корени". Атанасиевски додава дека целта на манифестацијата е да се постават мостови не само со Македонците дома, туку и со Македонците во светот.

- Целта е да се запознаеме со Македонија. Некои иселеници се две или три децении надвор, па важно е да си ја запознаат татковината. Не само да се запознаат со минатото, туку и со сето она што се случува во моментов во Македонија, додава тој.

Манифестацијата ја има комплетната поддршка од Владата, а како гостин ќе го има и Мајк Зафировски со тим од "Македонија 2025". Двата тима на 4 август ќе играат и фудбал.

Иселениците од САД, Канада, Австралија, Велика Британија, Швајцарија, Словенија, Србија, БиХ во текот на седумте дена ќе имаат набиена агенда во која ќе го видат туристичкиот потенцијал на Македонија, ќе ја пробаат нашата храна, ќе уживаат во сето она што го нуди оваа држава. Вклучена е и Туристичката комора во Македонија, која сугерирала за изборот на местата кои што ќе се посетуваат. Вања Стефковска, програмски координатор на настанот, вели дека на 3 август ќе се организира пикник на манастирот "Св. Јован Бигорски", а посетителите ќе слушнат и предавање за македонската резбарска школа. Ќе има и организирана посета на Вевчани како успешна туристичка приказна на Македонија. Паско Кузман ќе одржи предавање за проектот "Подводен град", а гостите ќе ги видат и сите поважни археолошки локалитети во Охрид. Драган Даутовски ќе приреди специјално изненадување, а концерт ќе одржи и Калиопи. Во групата која доаѓа во Македонија, има и веќе докажани бизнисмени, но и млади луѓе за кои ова ќе биде шанса да ја запознаат својата татковина како атрактивна туристичка дестинација.

- Целта беше на македонската дијаспора не само да и покажеме дека Македонија е вредна за атрактивна туристичка посета, туку и да ги запознаеме со сето она што најново се случува на полето на културата, музиката, археологијата. Тие веќе знаат за нашиот фолклор, треба да им ја покажеме и музиката на Кирил Џајковски, Тоше Проески и на многу други, додава Стефковска.

(А.Ј.)-Вечер