Според Бернал, класичната цивилизација има длабоки корени во афроазиските култури. Но, главно од расистички причини, уште од осумнаесеттиот век биле игнорирани, негирани или потиснувани

Грција не била единствена и супериорна, туку култура меѓу другите култури; Инфлуенците во грчката култура доаѓале од Египет; Грчката традиција е микс од повеќе култури, позајмени од околу; Грција има богат вокабулар, што може да се разгледува како мешавина, како што англискиот јазик е мешавина од неколку. Во Грција, тоа е индо-европското влијание; Не ја напаѓам Грција, туку го напаѓам митот за Грција како чиста нација.

Ова се тезите на професорот Мартин Бернал, автор на книгата "Црна Атена", кои ги кажа вчера, на трибина во Скопје.

Според него, класичната цивилизација има длабоки корени во афроазиските култури. Но, главно од расистички причини, уште од осумнаесеттиот век биле игнорирани, негирани или потиснувани.

Една од централните тези на книгата е дека и во античко време елинската цивилизација била мултикултурна, како што и денес целиот Балкански Полуостров е мултикултурен. Со други зборови, тоа значи дека народите на овие простори отсекогаш се мешале и дека никој нема ексклузивно право на антиката, или поинаку кажано, тоа право го имаат сите подеднакво.
На трибината, пред стотина гости, говореа и професорите Аристотел Тентов, Анета Шукарова, Митко Панов, академик Петар Хр. Илиевски...

Книгата "Црна Атена: Афроазиските корени на класичната цивилизација - том 1. Фабрикација на античка Грција 1785-1985", во издание на "Табернакул", официјалната промоција ќе ја има денеска, на Саемот на книга. Промотори ќе бидат проф. д-р Бранислав Саркањац, и доц. д-р Рубин Земон. Покрај обраќањето на авторот Бернал, во придружната програма ќе може да се чујат Милка Ефтимова со "Сефардска песна", Борис Трајанов, со "Пирин планино", Каролина Гочева - "Птицо малечка", и сето тоа со пијано придружба на Јасмина Чакар.
Поради научно аргументираните критички погледи, оваа книга досега не е објавена во Грција.

Култот на Орфеј бил преземен од религијата на античките Македонци
Проф. Шукарова имаше интересен преглед на култовите во старо време.
-Култот на Орфеј, култот на Деветте музи, биле преземени од религијата на античките Македонци. Исто се случило и со култот кон богот на сонцето, култот на кападокиската божица Ма..., рече Шукарова.

Таа направи и краток осврт на античките јазици.
-Античкиот македонски јазик не е дијалект на хеленскиот. Не постојат никакви факти за тоа. Постојат факти дека Македонците говореле на којне, јазик присутен и во Рим, Византија, Азија, Африка... Цивилизиран јазик на кој се разбирале народите. Исто, има и аргументи дека Македонците имале свој, варварски јазик, кој бил неразбирлив за Хелените, рече Шукарова, споменувајќи го познатиот пишан пример кога Александар Македонски и се обратил на војската на мајчиниот, македонски јазик.

Дејан ТРАЈКОСКИ- Вечер