Во  меѓувремето помеѓу Воскресението  и Вознесението Христови, повторно помеѓу нас беше омилениот гостин, нашиот зограф и пријател, отец Теодор Јуревич (Theodore Jurewicz). Откако минатата есен ги изобрази „Пресвета Богородица Поширока од Небесата“ и „Небесна Архиерејска Литургија“ во апсидата на олтарниот ѕид, веднаш по Воскресенските радости, му се израдувавме и на неговиот нов творечки изблик. Есеноска, на заминување во цртеж ни ги остави композициите „Причестување на Апостолите“ и „Благовештение на Пресвета Богородица“, па по неговото враќање веднаш се зафати со нивно довршување.

      По  концепт на нашиот старешина, отец Душко Ѓорѓиевски, композицијата „Причестување на Апостолите“ се живописа на просторот помеѓу сводот на апсидата и полусводот над Светиот Олтар, а „Благовештението“, по урнек на она во Курбиново, веднаш под неа од лево и оддесно.

      Композицијата на Архиерејската Литургија, зографот-отец Теодор, ја надополни со Собор на шеснаесет Свети Архиререи, живописани од левата и десната страна на средишната претстава чиноначалствувана од Светите Јован Златоуст, Василиј Велики, Григориј Двоеслов и Кирил Александриски, првите тројца-создатели на различните Свети Литургии на Вселенската Православна Црква Христова, а четвртиот-основоположник на Православното учење за Пресвета Богородица.

      Од  десната страна на Светиот Олтар, отец Теодор ги живописа: Св. Климент Охридски (чиј што дел од светите мошти е вграден во нашиот Храм), Св. Еразмо Охридски, Св. Григориј Охридски, Св. Иларион Мегленски, Св. Апостол Урван, еден од Седумдесетте и Епископ на Македонија-во долната поредица, и-Св. Јован Шангајски и Битолски, Св. Атанасиј Велики и Св. Марко Ефески во горната поредица Свети Архиереи.

      Од  левата страна на Светиот Олтар, Соборот  на Светите aрхиереи го надополнија: Св. Методиј Солунски, Св. Ахил Преспански, Св. Григориј Палама Солунски, Св. Герман Цариградски, Св. Горазд Моравски и Панонски-во долната поредица, и-Св. Петар Александриски, Св. Никола Мирликиски и Св. Фотиј Цариградски во горната поредица Свети Архиереи.

      Овој пат, отец Теодор беше придружуван и помогнат и од еден од неговите надарени наследници-неговиот син John, којшто ги изработи сите украси со кои се стави рамка за горе опишаните фрески.

      На  неколку дена пред заминување, двајцата зографи-татко и син, повторно во цртеж, на западниот ѕид, веднаш зад хорот на горната галерија, ни ја оставија претставата „Успение на Пресвета Богородица“, по образец на истата од манастирот „Свети Ѓорѓи Полошки“ од родната наша Македонија. Таа претстава по многу елементи е единствена и поинаква од слични такви по Православниот Свет, а нам ни беше предложена од нашиот Архиереј, дедо Методиј.

      Но  вредно е да се спомене дека за овој дел од живописот во целост е покровител здружението „Macedonian Orthodox Philantrophic Society of Columbus“. Тоа е здружение на младото поколение Македонци во Columbus, кои што повеќето се втора, трета генерација родени и израснати во Америка, а кои си поставија цел-афирмирање на Македонската Заедница пред Американската јавност, преку самостојно организирање настани, учество како заедница на разни јавни, спортски, културни и други настани во Охајо.

      И ете така, во напорот на ова богоугодно дело-фрескоживописувањето на нашиот Храм, се здружија силите на двете генерации Македонци, а од Христа знаеме дека каде што се двајца или тројца здружени во Негово име, и Господ е со нив, па затоа-пак нека го помолиме семилостивиот Господ да е со нас при секое наше заедничко дело! Амин, Господи!

 

Warning: No images in specified directory. Please check the directory!

Debug: specified directory - https://preminportal.mk/images/Ohio210610