Почитувани,

            Ве известуваме дека во недела (10 јули) со почеток во 20 часот во кафе-книжарницата „Магор“ ќе се одржи промоцијата на поетската збирка на израелската поетеса Хава Пинхас Коен „Песните на Орфеја“. На промоцијата ќе биде присутна и авторката, која специјално ќе допатува од Израел.

            Промотор на изданието ќе биде проф. д-р Елизабета Шелева, која е и преведувач на изданието. На промоцијата ќе се обрати и амбасадорот на Израел, Н.Е. Дан Оријан.

            Во голема мера, творештвото на Хава Пинхас Коен е поттикнато и предизвикано од парадоксалната и неизбежна врска, односно заемна упатеност, што владее помеѓу љубовта и смртта, како две интензивни гранични искуства. Тематско-мотивскиот комплекс Ерос-Танатос (што првпат е посочен како универзална антрополошка константа од страна на Фројд, инаку и самиот Евреин по своето семејно потекло) нагласено ја бои поезијата на Хава Пинхас Коен, особено по прераното заминување, предизвикано од фаталната болест, на нејзиниот сакан сопруг Јоси, во 1999 година. Отаде, една од нејзините книги, според која е насловен и овој поетски избор на македонски јазик, е наречена токму „Песните на Орфеја“ – низ кои провејуваат навистина потресни (но, не и патетично пренасилени) лирски сведоштва за нерамноправната битка со смртта, што ја води лирскиот субјект во непомирливите обиди одново да го истргне и да го врати од смртта својот сакан маж.

        Лирското писмо на Хава Пинхас Коен останува навистина животворно, будно отворено, приемчиво и расположено кон облиците на страста, кон еротизмот како дополнителен признак и посветеност кон животот како сетилна гозба и асоцијативно патување – аџилак.

            Хава Пинхас Коен не се расфрла со зборовите и со нив постапува економично, оти воопшто не игра на картата на реторичкото изобилство. Приоритетот на овие песни лежи другаде – во смелиот мегдан со егзистенцијалните суштини и граничните искуства, што претставуваат универзален клуч и онтолошки предназначен предизвик на секој човек и секоја жена.

            Поаѓајќи токму од тие, животно и лично „проверени“ искуства, доживувања и споредби – Хава Пинхас Коен изострено ја перципира и непогрешливо ја „лоцира“ иманентната метафизичност, својствена на самиот живот, наедно целејќи кон неа како кон ултимативен квалитет и личен печат на сопствената поезија.

             Хава Пинхас Коен е авторка на осум книги поезија и добитничка на повеќе престижни национални награди за поезија, професорка по литература и уметност, основачка и главна уредничка на литературното списание „Димуи“ (од 1990 година), како и уметничка директорка на поетскиот фестивал „Кисуфим“ (што ги обединува, од 2007 година, па наваму, писателите од еврејско потекло низ целиот свет), преведувачка и колумнистка.