Започнува третето издание на Неделата на Дизајн во Скопје

Утре започнува третето издание на Неделата на Дизајн во Скопје, настан кој наметна во Скојпе неочекувана динамичност и богатство од содржини, а пред сè го позиционира во глобални рамки.

Две години по ред, со голема умешност, Неделата на Дизајн во Скопје се осврна на најразлични области - индустриски и моден дизајн, графички дизајн, накит, дизајн на звук, адвертајзинг и маркетинг, дизајн на процеси, урбанизам, персонализирање и уште многу епитети кои ги издвоија македонските дизајнери и компании кои оваа платформа успеа да ги обедини и да им понуди излез на нови пазари. Токму поради тоа, програмскиот концепт на третото издание е задржан и надополнет, а критериумите за учество се заострени.

„Оваа година ја посветуваме на креирање на национална дизајн сцена и продукција насочена кон конкретен пазарен производ и освојување на нови пазари, затоа што тоа нам ни недостига, и ние како “одговорни” сметаме дека треба да интервенираме. Тоа и го направивме во изминатите месеци низ низа на работилници и слични ангажмани, а сега останува на публиката сама да даде суд за квалитетот на новонастанатата дизајн сцена во Македонија. Она што со сигурност го знам е дека оваа дизајн генерација ќе не претстави во светски рамки и во иднина ќе се шири и надградува низ новите изданија на SDW.” – изјави Александар Велиновски, директор на Skopje Design Week.

Секој ден од 10.00 до 17.00 часот се сите работилници, предавања и други форми на научно - едукативна и практична наобразба. ( работилници за креативни претпријатија; експериментален дизајн на продукти; додадени вредности; презентации за трендови и дизајн на Европскиот пазар за мебел; работилница за бизнис прототипи; работилница за дизајн во комуникацијата; различни презентации на производи и нивно успешно позиционирање на пазарите; детски работилници; презентирање на Шведскиот дизајн... итн.) Во попладневниот дел од 17.00 до 20.00 е време за деловни контакти во опуштена атмосфера (чил - аут музика, кулинарски презентации, раздвижување во актуелното гастро ќоше и сл.), додека вечерната програма - позната како најдобрата забава во градот - е за сите, со најдобрите бендови од регионот.

Оваа година особено внимание е посветено е на музичкиот дел. Прекрасна е глетката од вечерните концерти или ди-џеј сетовите со стотици, некогаш и неколку илјади луѓе, додека сите изложби се сè уште отворени за разгледување до доцна во ноќта. Skopje Desgn Week се доживува како еден од најзначајните културни настани во Македонија. Пример за отворањето го одбравме неверојатниот бенд од Словенија - КАР ЧЕШ БЕНД, кој за сите што не го слушале ќе биде вистинско изненадување на енергија, музика, инспирација, а за оние кои го знаат, сигурно ќе сакаат да ги спојат двата елемента на естетика. На големо задоволство на публиката, влезот е слободен за сите содржини.

„Магичноста на просторот на Куршумли Ан кој веќе станува претесен за бројните содржини и активности што ги подготвивме и овој пат ќе помогне дизајните да ги видиме во најубаво светло. Водени од пристапот на учење низ работа креираме уникатен и современ концепт на саем како место за едукација, комуникација, заедничко креирање, споделување на искуства и градење на нови врски и контакти . Во таа насока годинава најмногу ќе ни помогне и непосредната инволвираност во различни нивоа од програмата на врвните дизајнери од една од водечките дизајн сили на денешницата – Швајцарија." - додаде Марта Наумовска - Грнарова, програмски директор на Skopje Design Week.

Сите информации за работилниците, како и за целокупната програма, можете да ги најдете на www.ministryofpleasure.net и на фејсбук https://www.facebook.com/skopjedesignweekoffical.