Храмот Божји претставува скала која што не води и воздигнува во Царството Небесно. Неговата внатрешност не потсетува на Небесата и го воздигнува нашиот ум и срца кон Бога во висините. Господ ја создал црквата и и` дал ветување, дека и вратите на адот не ќе можат да ја надвладеат (Мт. 16,18). Исто така, на црквата Господ Бог и дал право да ни ги разделува на верните Божествените Дарови. Божјите очи и срцето Негово престојуваат во храмот во сите денови (3Цар. 9,3). Токму таму, со една уста и едно срце ние го славиме Господа, му се молиме за простување на нашите гревови да ни подари големи и богати милости.
И на денот, кога светата Православна Црква си спомнува за светите три маченички Вера, Надежд и Љубов и мајка им Софија, православниот христољубив народ се собра на преосветувањето на внатрешноста на манастирската црква посветена на светиот великомаченик Димитриј во близина на прилепското село Селце и на осветувањето на новоизградената камбанарија и црковните ѕвона. Со Архиерејска Божествена Литургија и со чинот на осветувањето чиноначалствуваше Неговото Високопреосвештенство Митрополитот г.г.Петар, во сослужение со настојателот на манастирот и свештеници од прилепското намесништво. Митрополитот г.г.Петар одржа пригодна беседа, каде што меѓу другото нагласи ”…кога бараме нешто од Бога, тоа треба пред се` да го бараме со силна вера во Бога ...кога бараме од Бога, да бараме се што е за спасение на нашите души и на ближните и тоа со силна вера и усрдна молитва од нашите срца.“
За да се возобнови,доизгради и украси овој храм , како внатрешно така и надворешно, заслужуваат секаква пофалба пред се` верните чеда на православната црква од градот Прилеп и околината, настојателот на манастирот протојереј Темелко Блажески со црковниот одбор како и локалната самоуправа на општината Прилеп.
Александар Бошкоски
