Ете ја Мајката која никогаш не не оставила, ниту ќе не остави!

Пред една недела, во нашиот Светотроитски манастир во Џорданвил, ни дојде чудотворната Коренокурска икона на Мајката Божја, Знамение. Истата ќе остане уште неколку дена.
Навистина е радост, благодат и утеха за нас да се наситуваме со радости покрај оваа чудотворна икона. Таа патува насекаде во светот за луѓето да и се поклонат и испросат милост од Неа. Кога чувствуваш и се соочуваш со многу искушенија, знаеш дека оваа голема светиња е овде, и веднаш со солзи пристапуваш и ја молиш Царицата Небесна да те утеши.

Неколку пати имам објавувано новости за пристигањето на оваа чудотворна икона во нашиот Џорданвилски манастир. Овој пат радоста беше уште поголема. Во последно време забележано е, односно од чудотворната икона почесто почна да се чувствува силно благоухание на миро. Истата икона не е мироточива, како онаа во Хаваи, но на моменти почна да се чувствува силно благоухание.
Тоа и ние го почувствувавме во Џорданвил. Кога јас за време на вечернта ја целивав иконата, силно благоухание се чувствуваше од Неа. Утредента го прашав игуменот на нашиот манастир дали ставаат некакво миро на иконата, тој ми одговори дека ништо не ставаат. И самиот тој го прашал хранителот на иконата дали тој става миро, но и тој одговори дека не става ништо, туку во последно време многу често почна да се чувствува овој мирис.
Мајката Божја ни покажува голема милост. Таа ни кажува дека не не остава, се грижи за нас, се моли пред Христа за нас, нејзините чеда!
Мајка! Ете ја Мајката која никогаш не не оставила, ниту пак ќе не остави.
        Радувајте се!
                                                   Стојан Серафим Андов
                                                   Светотроитски манастир,
                                                   Џорданвил, Њујорк