Скопје, 12 март, лето Господово 2013- МПБ „ Св. Климент Охридски“
Со децении наназад во просториите на Македонска православна богословија “Св. Климент Охридски“, во соработка со Црвениот крст и Институтот за трансфузиона медицина се организираат акции за дарување крв. Учениците и професорите со молитви за оздравување на болните и повредените, редовно земаат учество во оваа акција. Генерации на ученици кои матурирале во Богословијата, и во текот на своите студии на Теолошкиот факултет и вон тие рамки, постојано се учесници во акциите за дарување крв. Љубовта и грижата за ближниот и за секој човек се преточува од нивните топли хумани срца во даруваната крв.
Горан Цветковиќ, 5.г. Богословија „Св. Климент Охридски“, Скопје: „Верата без добри дела е мртва. Ние како православни христијани чувствуваме потреба да чиниме добри дела онака како што не поучува нашиот Спасител Господ Исус Христос за доброто на ближните свои, дури и за нашите непријатели.“
Васко Костов, 5.г. Богословија „Св. Климент Охридски“, Скопје:
„Божјата љубов кон нас и нашата љубов кон Него како вистински православни христијани ни ги облагородува срцата и душите со љубов и грижа и за ближните свои и за сите наши браќа и сестри. Дарувањето крв е само еден момент од тоа наше живеење. Го чувствувам тој повик во срцето, денес трет пат дарувам крв и ќе го следам тој повик и натаму. Му благодарам на Бога што еве денес сме учесници со моите браќа во оваа крводарителна акција - изјави еден од учесниците.“
Професорот Антонио Апостолоски, заедно со своите 16 ученици учествуваше во оваа крводарителна акција. Радосно беше да се биде со нив. А во параклисот на Богословијата каде се приклучиа учениците од останатите години, потоа, сите заедно, отслужиа прекрасна Вечерна богослужба во чест на утрешниот празник.
Бог по молитвите на св. Агатангел Битолски и преподобен Прокопиј Декаполит, чиј спомен денес го чевствуваме, нека им дарува исцеление на душите и телата на сите оние кои боледуваат и страдаат и на сите наши браќа и сестри здравје и спасение.
Упатуваме честитки од учениците, професорите, екипата од ИТМ и ЦК и редакцијата на Преминпортал, за именденот на Неговото Високопреосвештенство , Митрополитот Повардарски.г. Агатангел.
На многаја лета Владико свет!
12 март, лето Господово 2013
Преминпортал (д.б./к.т.)
