На 28 април 2013 г. во манастирот Свети Наум охридски чудотворец во скопската населба Радишани се прослави влегувањето на Господ Исус Христос во Ерусалим - Цветници; заедно со празнувањето и на спомените на светите апостоли Аристарх, Пуд и Трофим. Торжеството и со Светата божествена литургија ги предводеше отец Владимир Кралев во сослужение на ѓакон Игор Миланов. Верниот народ се причести со Светите Христови Тајни. Старешината отец Гоце ги благослови славските колачи.
Во прекрасниот пролетен амбиент на манастирот свети Наум на падините на Скопска Црна Гора; со духовното присуство на блаженоупокоените во Христа и секогаш спомнувани поглавари на Македонската православна црква – Охридска архиепископија, г.г. Гаврил и г.г. Михаил; и бројните семејни обители взаемно допринесуваа верните да ја доживеат величественоста на настанот.
Отец Владимир ги храбреше верните со сознанието за создавањето на човекот како круна на сè во природата. Пред нас е Страсната седмица која во исто време е тажна но и величествена. Како што Мојсиј ја kрена змијата на дрво во пустината па секој отруен кој што ќе погледне на неа да се спаси, така е спасителна и за нас жртвата на крстот. Да се загледуваме почесто во Христос , да ја јакнеме нашата вера и да црпиме сила како кога имаме потреба од исцеление така и за севкупен развиток на личноста. Можеби и да го доживееме предвкусот на величественоста на божествената природа која по благодат сме ја добиле како луѓе.
За Преминпортал: Ратислав Кардалев
