Божествена Литургија во манастирот во Калишта
На денот кога Светата Божја Црква ги празнува спомените на светите маченици Аникита и Фотиј; светиот свештеномаченик Александар, епископ Комански; во манастирската црква во Калишта посветена на Раѓањето на Пресвета Богородица, отец Стефан Санџакоски одслужи Света Божествена Литургија. Верните се причестија со Светите Христови Тајни. Хорот Калистрат Зографски со своето пеење го воздигна торжеството.
Во својата беседа отец Стефан Санџакоски ја започна со повикување на Преображението Господово кога ни се открива Неговата Божествена природа. Со тројцата избрани апостоли и ние да станеме поуверени во Зборот кој ни се открива. А во денешното евангелско читање дознаваме дека и неуките рибари во коработ притиснати од езерската бура не можеа јасно да го согледаат својот Равуни додека Тој не им се јавил. Рибарот Петар повторно прв го прифаќа повикот Господов и му притрчува по водата сè додека преплашен од својот подвиг не почнува да тоне и воскликнува – ГОСПОДИ, СПАСИ МЕ. Христос го согледал човечкиот страв кај рибарите и ги повикува да го надминат со верата во Него.
Навистина колку ова и самите ние катадневно го доживуваме. Само што нашите битни стравови не потекнуваат од бурите на Охридското Езеро туку од нашиот неуреден живот, страстите, отуѓувањето од Изворот на Животот затоа што нашите ќефови ги поставуваме над Божјата волја. Затоа по Литургијава нека бидеме поуверени во Христовата Вистина и нека одекнува и во нас воскликот на Петар ГОСПОДИ СПАСИ МЕ.
За Преминпортал (к.т.)
