Од Архивата на Бигорски манастир
Чудотворни икони во воздушна литија над Украина 
28 јануари 2014
Неколку чудотворни икони на Пресвета Богородица и со мошти на светии денес беа внесени во авион кој во текот на седум часа ќе ја обиколи цела Украина, соопштува сајтот „Православието во Украина“. Ова утро во десет часот иконите и моштите полетаа со специјален авион, а за време на летањето ќе се читаат молитви за мир.
Воздушната литија се прави со благослов на Киевскиот митрополит Владимир. Во авионот се наоѓаат претстојателите на: Почаевската лавра, митрополит Владимир, на Киевскиот манастир „Воведение Богородично“ епископ Дамјан, на Десјатинскиот манастир, архимандрит Гедеон и монаси од Почаевската лавра.
Над Украина денес летаат некои од најпочитуваните кај народот Богородични икони, меѓу кои чудотворната икона на Пресвета Богородица од Почаевскиот манастир (на првата фотографија), чудотворната икона „Призри на смирение“ и др.
По полетувањето авионот неколку пати ја обиколи престолнината Киев и потоа се насочи кон другите градови во земјата.
Истовремено медиумите во Украина соопштуваат дека повеќе од 50 жени на свештеници се излезени на улицата „Грушевски“ во престолнината и стојат меѓу демонстрантите и полицијата. Тие исто така читаат молитви за прекин на насилството во земјата.
Во саботата во соборниот храм „Успение Богородично“ на Киево-Печерската лавра пристигнаа Даровите на мудреците. Илјадници верници формираа редови за да се поклонат на светињите. Во недела вечерта ректорот на Киевската духовна академија, митрополитот Антониј отслужи молебен за мир во соборниот храм на Киево-Печерската лавра. Заедно со духовниците се молеа и деца од неделните училишта на Киев. Малечките беа дојдени на поклонение пред Даровите на мудреците и се помолија да не започне војна во нивната татковина. Над две илјади лица учествуваа во детскиот молебен за мир. Во своето слово, митрополитот Антониј истакна:
„Украинската православна црква даде иницијатива во целата земја да се прават детски молебни за мир. Во дните на големите искушенија нашата молитва е посебна. Преку чистите души на нашите деца ние ќе Го молиме семилостивиот Господ да дарува на татковината мир, да го запре непријателството и братоубиството. Се надеваме дека детската чиста и пламена молитва ќе ги спречи возрасните да направат непоправлива грешка“, изјави архиерејот, како што е цитирано од Патријаршија.ру.Извор: Двери
Преземено од: Бигорски манастир
