Денес напладне, во Претседателската резиденција на Водно, Претседателот на државата г. Стево Пендаровски му го додели високото државно одликување „Орден за заслуги за државата" на Бигорскиот Манастир „Св. Јован Крстител", по повод 1000-годишнината од неговото основање. На свеченоста свое обраќање имаа македонскиот претседател Пендаровски и старецот и игумен Епископот г. Партениј, а настапи и бигорскиот монашки хор.
„По повод 1000 годишното постоење, Бигорски Манастир Св. Јован Крстител
го одликував со Орден за заслуги за Република Северна Македонија за зачувувањето и за продолжувањето на илјадагодишната традиција и за придонесот во негувањето на духовното и на културно-историското наследство, за грижата за уметничките реткости и за постојаните социјални и хуманитарни активности. Бигорскиот манастир со својата жива духовна и културна мисија и ангажман е едно од нашите најголеми духовни светилишта, кое низ вековите, и денес, во континуитет претставува извор на писменост, на култура и уметност", изјави во своето обраќање претседателот.
Епископот Партениј, игуменот на Бигорскиот Манастир потенцираше дека е значајно што орденот се доделува во време на духовна морална ерозија, кога искуството на предците до крајност е занемарено.
„Бигорски Манастир како место на постојана молитва и патоказ за духовна генерација испраќа силна порака во нашето општество за тоа дека калта на овој свет не може да го засени блесокот на златото (севкупното христијанско наследство и Светото православно предание), што ја одразува светлината на Божјата убавина на благородството и на љубовта", кажа во своето обраќање епископот г. Партениј.
На свеченоста присуствуваше и г-ѓа Елена Пандева, долгогодишен пријател и поддржувач на Бигорскиот Манастир и на братството и сестринството. Со свои искрени честитки и желба за продолжување на благородната мисија на манастирот, таа упати топла порака до Светата Бигорска Обител.
„1000 години Св.Јован Бигорски, 1000 години љубов, верба и работа. Отец Партениј со братството и сестринството, вечни да сте! Бесконечна светлина на патот до нашиот Господ сте... Ве сакаме".
Според Бигорскиот поменик, манастирот бил основан од страна на монахот Јован во 1020 година, а во XVI век манастирот бил разрушен од страна на отоманската власт и од целиот комплекс останал само мала црква. Од помениците исто така се дознава дека манастирот бил повторно обновен во 1743 година од страна на јеромонахот Иларион, кој бил и првиот игумен на Бигорскиот манастир во поново време.
Бигорскиот манастир го сочинуваат манастирската црква, која е посветена на Јован Крстител, костурницата, сместена до самата црква, сејменската одбранбена кула, комплексот манастирски конаци, како и новоизградените гостински конаци.
Најубавиот украс во црквата и она по што е најпознат овој храм е прекрасниот и единствен од ваков вид во православието иконостас, врвно дело на мијачките копаничари, кои по својата вештина на обработка на дрвото останале ненадминати и до ден-денес. Тоа се прочуените Петре Филиповски – Гарката од село Гари и Макариј Фрчковски од Галичник. Тие ова монументално дело го завршиле за зачудувачки кратко време, од 1830 до 1835 година.
Централната прослава за обележување на милениумскиот јубилеј ќе се одржи в недела во Бигорскиот Манастир.
Скопје, 15ти октомври 2020 г.
