Воочи празникот на светиот свештеномаченик Кипријан Слепченски, по Божјо благоволение, излезе од печат вториот дел од книгата Слепченски пролог со химнографија, творештво на сестринството на Манастирот св. Јован Претеча Слепче.
Во вториот дел, продолжение на месец Декември, се содржани светителите кои се празнуваат од 10 до 20ти ден во месецот, нивно пролошко житие, икона на светителот, тропар на македонски, со превод на црковнословеснки и англиски јазик, приложени на западни нотни и источни неумски партитури.
Вториот том е збогатен со фрагменти од ракописниот Слепченски стиховен пролог од 16 век, пишуван од рацете на познатиот книжевник Висарион Слепченски, како и со калиграфска изведба на тропари напишани со глаголично писмо.
Во продолжение, споделуваме извадоци од рецензиите во вториот том, Слепченски пролог со химнографија:
„...Книгата што сега ја држите в раце, во себе ја соединува долговековната христијанска традиција на таквото логосно прославување на Бога, која ѝ е оставена во наследство на Црквата уште од апостолот Павле, кој ги бодри христијаните на „…паслми, славословија и духовни песни, пеејќи и воспевајќи Го Господа во срцатаваши.“ (Еф. 5: 19). Во изданието приредено од монашките обители од „Свети Јован Претеча – Слепче“ и „Свети Атанасиј Велики“ Журче, христијанската уметност на словото и славата ни е предочена низ структура на повеќекратни вкрстувања...
...Со исполнувањето на подвигот што резултира со издавањето на Прологот, како подарок за нашата средина, монашките заедницина манастирите „Свети Јован Претеча“ од Слепче и „Свети Атанасиј Велики“ од Журче ја покажаа љубовта кон ближните, оцртувајќи ја хоризонталата на Крстот,додека со славословието упатено кон Бога содржано во книгата бидува исцртана и вертикалата на Крстот.“ - д-р. Игор Радев
***
„Во приложениот исклучителен труд на сестринството од манастирот на славниот Претеча во Слепче, со благослов и под духовно раководство на отецот Серафим, пред нас се издигнува вистинското огледало што треба да ја покаже вредноста на современата македонска духовна култура и нејзиното еонично траење. Во овој колосален потфат на уметничко изобразување на животот на светиите кои останале помалку познати во историскиот живот на Црквата, и пеењето света песна за нив како довршување на нивната ипостас во миомирисните красотни простори на литургискиот живот, пред нас се отвора сета полнота и плодоносна суштина на монашкиот живот но и на врската на тој живот со Светиите. Дијалектичната напрегнатост на осамата и општежитието раѓа плодови достојни за жртвата на монахувањето...
...Делото на Слепченското сестринство потврдува дека македонската култура истрајува во лоното на Христа, во вечноста на Логосот.“
- д-р. Ристо Солунчев
Професор на Философски факултет, Скопје, УКИМ,
и Хорархос на Македонскиот византиски хор „Хармосини
***
„Отсега на располагање за употреба во богослужбите и во ќелијните молитвени правила се ставаат и предложените тропари. Овој храбар исчекор кон возобновување на, кај нас одамна подзаборавената традиција на создавање црковна поезија, ни дава повод да се замислиме за одредени творечки предизвици во врска со различните аспекти на естетско-уметничкиот израз, како и архитектониката на химнографската творба, односно нејзината структура. Овие позиции всушност ја конституираат физионимијата на црковно-поетскиот логос...
...Срдечно го поздравувам опитот на сестринството од манастирот „Св. Јован Крстител“ во село Слепче во однос на химнографското создавање, кој ми е мил, и истовремено ги охрабрувам истите да продолжат да понираат во длабините на свештената химнографија, и да ги следат примерите на светите мелоди на Црквата Христова, подражавајќи го нивниот светол творечки подвиг.“
- Проф. д-р Димитри Кумбароски
***
„ ...Книжевната дејност на Сестринството, како обем и чисто техничка работа
при изготвувањето на зборниците со житија и тропарите за секој ден (од годината), спокојно можеме да ја наречеме бескрвна, пејачко-поетска, словесна жртва, (т.е.)подвиг. Со овој подвиг се бележи нов период во богослужбената и пејачка практика на помесните православни цркви. Овие химнографски венци и словесни цветови во чест на светиите се пример и образец за подражание за сите химнописци и песнописци од другите соседни православни цркви... ...Посебна почит и пофалба заслужуваат сите оние кои со своите идеи, знаење, ревност и копнеж, вклучително и композиторот Маестро Георги Секулоски, придонесоа да се создадат вакви уникатни зборници.
...Го читаме житието, го пееме тропарот и се чувствуваме окрилени, бидејќи не сме сами на патот кон Бога!
Работата на Сестринството е гнијално замислена за современите потреби на
христијанското општество и за привлекување на сите во Православната Црква, за Слава на Бога и вечно спасение!
- д-р. Калин Кирилов
Софиска духовна семинарија „Св. Јован Рилски“
***
„Оваа книга е уникатно издание. За прв пат се предлага јасно дефиниран календарски систем на православни тропари за светителите на денот.
Древните и современите сочиненија се хармонично поврзани. Уникатноста
ја додава и фактот дека тропарот кон секој светител е напишан на три јазици – црковнословенски, македонски и англиски јазик. Овој тропарник уште може да се користи и на певницата за црковно песнопеење. Секој тропар е придружен со нотен запис – современ и знаковен распев (неуми). Ова е огромен и благословен труд.“
- Олег Устинов, Харков, Украина
ВО СЛАВА НА СВЕТАТА И ЕДИНОСУШНА И НЕРАЗДЕЛНА ТРОИЦА ОТЕЦОТ СИНОТ И СВЕТИОТ ДУХ
СЕГА СЕКОГАШ И ВО ВЕЧНИ ВЕКОВИ АМИН!!!
Св. маченик Созонт; Св. апостоли Евод и Онисифор; Св. маченик Евпсихиј; Св. Јован, архиепископ Новгородски; Преп. Касијана Песнописателка ;
