ВОДОКРСТ, во храмот Пресвета Богородица - Тетово
18.01.2025 ВОДОКРСТ, во храмот Пресвета Богородица -Тетово, митрополитот Тетовско-гостиварски г. Јосиф богослужеше Златоустова литургија на која сослужуваа протоереј-ставрофор Томислав Јосифоски, протоереј Предраг Исаевски, протоереј Жарко Мицкоски, протоереј Илија Сламков и ѓакон Живомир Јосифоски. Верниот народ се причести со Светите Тајни.
По светата Литургија се изврши и голем Богојавленски водосвет и според традицијата во Тетово, на Водокрст беше положен светиот крст во водите од базенот во дворот на храмот.
Со свое слово се обрати митрополитот г. Јосиф, кој меѓудругото нагласи: Денес браќа и сестри сме тука во овој велелепен храм посветен на Пресвета Богородица во горно мало-Тетово. По светата Литургија ќе го извршиме големиот Богојавленски водосвет и ќе го положиме светиот крст во водите, и со тоа ќе ја продолжиме траицијата кој ја благословил нашиот претходник митрополитот г. Кирил, која што е востановена уште во 1986 година.
Денешниот празник во народот е познат како Водокрштение, Водокрст или Водопост. Водокрст доаѓа од крштевањето, односно осветувањето на водата, а Водопост поради тоа што се работи за пост. Оваа година типикот дозволува пост со зејтин бидејќи е сабота. Овој празник е востановен во спомен на крштението на луѓето кои го примиле христијанството. Во Светата Црква се познати две осветувања на вода: големо и мало. Големото осветување се врши два пати во годината: токму во денешниот ден, на Водопост, во предвечерието на Богојавление и утре на Богојавление, за што се сеќаваме на крштението на Господ Исус Христос во реката Јордан, во кое Црквата го гледа прототипот на очистување на гревовите, но и вистинско осветување на природната вода со присуството на Бога.
Значи, во овој ден и во утрешниот ден се извршува Големо осветување на водите, Богојавленски водосвет. Исто така, секој пат кога се извршува Крштение, се случува големо осветување на вода. Додека, пак, Малиот водосвет се врши во разни прилики, како при други црковни чинови и на барање на верниците. Во зависност од потребата, малото осветување може да се изврши во секое време и на секое место: во куќа, во поле, во градина и тн.
Осветената вода има свое потекло уште во првите векови на христијанството, за што сведочат древните пишани извори како Делата Апостолски, Евхологион, Серапион Тмутски, како и отците од првите векови: Теодорит, блажени Ероним, Епифаниј и други. Освен што водата ја гаси телесната жед, таа ја користиме за гасење и на духовната жед и тоа преку чинот на осветувањето, се осветува и станува света вода.
На грчки „светата вода“ се нарекува „агиазма“ (αγίασμα) - „светиња“. Светиња се нарекува сето она што е исполнето со благодатта Божја. Под „агиазма“ се подразбира водата над која е извршен чинот водосвет. Читајќи ги молитвите и спуштајќи го Животворниот Крст во водата, истовремено Светиот Дух слегува врз обичната вода и ја прави необична, ја прави света и благодатна и кога ја користиме и пиеме од светата вода на еден начин ние ја здобиваме благодатта од Светиот Дух. Постои благочестиво предание на овој и утрешниот ден, со осветената вода да се попрскаат домовите на верниците, пеејќи го тропарот на Богојавление. Оваа како и водата осветена утре, се користи преку целата година, за по нејзината моќ здравите да се укрепат, болните да се исцелат. Од сето срце како ваш надлежен архиереј ви посакувам добро просветление на сите!
Впрочем, овој празник со црковниот јазик се нарекува уште и Просвештение, бидејќи е празник на Божјото просветление. Секој што ќе Го спознае Бог во Троица, станува богопросветлен.
За многу години!
