Господи, ти си одредил покајание за мене грешниот, сакајќи заради Твоето неизмерно милосрдие мене недостојниот да ме спасиш. Припаѓам кон Тебе и Ти се молам: смири ја преку постот мојата душа, зашто како кон покров прибегнувам кон Тебе, Единствен Многумилостив.
Утрена, Чист четврток

 Поуки од Светите отци: Затоа, во кого во срцето се наоѓа лажливост, омраза, осудување, тој претходно нека ја очисти душата своја, па тогаш нека пристапи и пости и се моли. Кој е непријателски расположен спрема својот брат и го исмева, тој прво нека се измири со братот и нека му прости; дури тогаш тој може да се приближи кон Господа.
Свети Ефрем Сирин

Молитва:
 Господи, во срам и тага се отвораат дверите на моето срце. Помогни ми да ги спознаам моите гревови, укрепи ме и вразуми ме да помолам за прошка. Избави ме од тврдоглавост и срдечна закоравеност и заштити ме, зашто на тебе се надевам. А кога ќе се вселиш во нас, Спасителу, очистувајќи ги нашите срца, никогаш повеќе не нè напуштај. Амин.

 Читања од Светото Писмо:
 Исаија 2, 11-21
 Битие 2, 4-19
 Соломонови Изреки 3, 1-19

  Созерцание: Не се сметај за мудрец; бој се од Господа и бегај од злото.
Соломонови Изреки 3, 7

Подготви: А.Л.

Посети:{moshits}

Од Православен календар на МПЦ

Свети Лав, епсикоп Катански     05/03/2009

Свети Лав им беше добар пастир и милосрден наставник на луѓето во градот Катана под вулканската планина Етна. Многу се погрижи околу болните и сиромашните. Неговата ревност за верата беше исто толку голема како и неговото милосрдие кон неволните. Во тој град се појави еден маѓепсник Илиодор, кој го замајуваше народот со разни магиски вештини и ја развраќаше младежта во градот. Еднаш за време на литургија влезе во Божјиот храм и се зафати да волшебствува. Свети Лав му пристапи, го врза со едното крајче на својот омофор и го одведе на градскиот пазар. Овде нареди да се запали голем оган и кога огнот се разгоре, влезе самиот во него и го вовлече внатре и Илиодор. Илиодор сиот изгоре, а Свети Лав остана неначнат од огнот. Од ова сите што беа замајани од Илиодор и гледаа во него божество се засрамија. А милосрдниот и ревносен Лав се прочу по целото царство како голем чудотворец, којшто со своите пресветли чуда им помага на луѓето. По неговата смрт од неговите мошти потече исцелително миро. Се упокои во 8 век.

Светиот свештеномаченик Садок     05/03/2009

Беше епископ во Персија после Св. Симеон. Еднаш во сон му се јави Св. Симеон и му рече: „Вчера јас, денес ти!“ Овие зборови Св. Садок му ги протолкува на своето стадо со значењето: „Лани пострадав јас, а оваа година ќе пострадаш ти!“ И навистина, таа година царот Сапор го уапси, заедно со многуборен клир и народ и ги изведе на суд. Прво им нареди да им се поклонат на огнот и на сонцето како на божества. Садок одговори: „Ние сме од сесрце подготвени да умреме за нашиот Бог, но на сонцето и на огнот нема да им се поклониме“. По ова беа мачени и осудени на смрт со меч. Пред смртта Св. Садок Му ја вознесе на Бога оваа молитва: „Измиј нѐ, Боже, во нашата крв од нашите гревови!“ Неговите свештеници и верни заедно со него си ги предадоа телата на смрт, а душите на Бога бесмртниот. Пострадаа во 342 или во 344 година.