† СТЕФАН

ПО МИЛОСТА БОЖЈА,
АРХИЕПИСКОП ОХРИДСКИ И МАКЕДОНСКИ,
ЗАЕДНО СО СВЕТИОТ АРХИЕРЕЈСКИ СИНОД,
ДО СВЕШТЕНОСЛУЖИТЕЛИТЕ, МОНАШТВОТО
И ДО СИТЕ ЧЕДА НА
МАКЕДОНСКАТА ПРАВОСЛАВНА ЦРКВА,
А ПО ПОВОД ВЕЛИГДЕНСКИТЕ ПРАЗНУВАЊА,
ИСПРАЌА МИР И БЛАГОСЛОВ ОД БОГА,
ПОЗДРАВУВАЈЌИ ГИ СО ВЕЛИЧЕСТВЕНИОТ И ТОРЖЕСТВЕН ПОЗДРАВ –

ХРИСТОС ВОСКРЕСЕ!

„Јас сум воскресението и животот;
Кој верува во Мене, и да умре, ќе оживее”
(Јован 11, 25)

Возљубени чеда во Христа воскреснатиот,

Христовото Воскресение ја објасни смислата и на создавањето и на постоењето на светот и човекот! Бог, од Својата преголема љубов, го создаде човекот за вечен живот во заедница со Него. И Господ Исус Христос - Богочовекот, пак од љубов, стана соучесник во човековото страдање и смрт, за човекот да биде учесник во Неговото воскресение и вечниот живот.

Бог е живот и единствен Извор на животот! Оттаму, во нашата вера животот има централно место и Велигден е празник на животот. Затоа на денот на Христовото распетие занемеа сите созданија, зашто кој може да го објасни чудото - да страда Оној Кој е Живот, да страда Самиот Бог!?

Светата Црква Христова веќе 20 столетија Му благодари на Бога за љубовта и жртвата. Со секоја света Литургија учествуваме во Голготското страдање и сепобедното воскресение. Со Божја помош, дочекавме и годинава да празнуваме исполнети со богодарувана радост, следејќи ја незаодливата светлина што извира од празниот Христов гроб. И коработ на Светата Македонска Црква, еве, вплови во времето на големото духовно торжество, па дарувани и исполнети со воскресенска радост и божествена љубов, се најдовме во мирното пристаниште на најголемиот христијански празник - Пасхата наша, Пасхата Христова - Воскресението Христово - Велигден.

Со воскресението Христово, животот доби ново вреднување и сè што постои се преобразува; со воскресението Христово замина стариот, а воскресна новиот човек, ослободен од бремето на гревот. Со воскресението Христово слободата влезе во човечкиот живот и тоа е најголемиот дар. Со Христовото воскресение и човечкото достоинство постана вечно и неуништливо, доброто конечно триумфира над злото, а љубовта се потврди дека е вечна и дека Бог не е Бог на мртвите, туку Бог на живите.

Преку победата Христова над смртта животот доби нова смисла, зашто пред човекот се отвори нова перспектива - му се даде можноста да седне од десната страна на Отецот и да го здобие Царството Божјо. Токму заради овие причини светиот апостол Павле вели дека доколку „Христос не воскреснал, тогаш празна е нашата проповед, празна е и вашата вера... Но, Христос воскресна!” (1 Кор. 15. 14 и 20).

Возљубени празникољупци,

Велигден е суштината на Христијанството! Со Христовата воскресенска победа човекот се надева и на свое воскресение и на свое избавување и преобразување. Со воскресението човекот ја доби и откри смислата на постоењето и во неговиот живот се насочија и осмислија љубовта и разбирањето со другите.

Воскресението на Голготскиот Маченик ни го посочи патот кон вистинската светост, патот на вистинската љубов и мудрост. Живеејќи ги придобивките од сепобедното Христово воскресение и примајќи го „новото питие”, ја вкусуваме содржината на вечноста, го вкусуваме вистинскиот живот и, заедно со Господа, стануваме победници над гревот, смртта и распадливоста.

Возљубени чеда во Господа,

Она што за луѓето беше неможно, со воскресението стана можно! Бог покажа најголема жртва и љубов кон човекот. А љубовта Божја нема ниту временска граница, ниту просторно ограничување. Таа сите подеднакво ги прегрнува, на сите исто им се дарува и на сите и на сè се радува. Според својата природа таа е вечна, сеопфатна и безгранична; таа подеднакво ги љуби и живите и упокоените, и праведните и покаените грешници, и луѓето и созданијата.

Љубовта, пак, која ја сака само сегашноста и која луѓето ги предава во ништожност, е лажна и демонска љубов. Љубовта која не е во состојба да воскресне мртви и самата е мртовец. Љубовта која не може да го победи демонското зло, гревот и смртта, самата се претвора во прелест и привид. Љубовта која не е подготвена да слезе во најмрачните подземја на човековата огревовеност и богоотуѓеност, никогаш не ќе може да се претвори во живот и светлина на луѓето. Затоа, оној којшто е Христов и сака да биде Негов во вечноста, нека се исполнува со Неговата воскресна, вечна и од смртта посилна љубов.

Возљубени духовни чеда,

Во годината кога се одбележуваат 1630 години од упокојувањето на свети Василиј Велики, како и 1140 години од упокојувањето на свети Кирил Солунски и 150 години од ракополагањето на Партениј Зографски за Кукушко-полјански епископ, Македонија и македонскиот православен народ, верни на преданијата кои ни ги оставија овие сехристијански и македонски великани, го прославуваме овој Велигден.

Празникот Воскресение Христово - Велигден сите нè образува и воспитува во доброто. Ние, Македонците, имаме многустолетна историја и долга христијанска традиција. Македонија е местото од каде во Европа започна да се шири светото Евангелие и христијанската цивилизација која донесе и гради вечни и непропадливи вредности. Затоа секогаш да се потсетуваме на светлите и славни времиња од нашата историја, зашто ако не се потпреме врз минатото, не ќе имаме сегашност и не ќе си обезбедиме иднина. Оти, и минатото, и сегашноста и иднината се неделиво траење во Господа!

Македонецот насекаде, и во својата татковина и раселен по светот, знае со почит да го препознае овој неповторлив и свет ден, нарекувајќи го Голем ден - Велигден, со што ја искажува суштината и величественоста на Празникот над празниците и на овој спасоносен настан. Денот на Воскресението Христово е вистинска можност да се сплотиме како народ, да си простиме еден на друг, братски и со љубов да си подадеме рака, покажувајќи дека сме чеда на воскреснатиот Господ и достојни следбеници на многубројните богољупци од нашиот род.

Да побрзаме, како жените мироносици, за да му ја објавиме на светот радосната вест, дека Господ Христос воскресна од мртвите! Да Му благодариме на Бога за добрините што ни ги прави, да го благословуваме Неговото име и за Него нека ни бидат постојано отворени нашите срца! Да се облечеме во Неговиот живот и во Неговата личност, и да воскликнеме со сето наше битие:

Христос воскресна! Навистина воскресна!

АРХИЕПИСКОП
ОХРИДСКИ И МАКЕДОНСКИ
† С Т Е Ф А Н

ЧЛЕНОВИ НА СВЕТИОТ АРХИЕРЕЈСКИ СИНОД:
† КИРИЛ, Митрополит Полошко-кумановски
† ПЕТАР, Митрополит Преспанско-пелагониски и
администратор Австралиско-новозеландски
† ТИМОТЕЈ, Митрополит Дебарско-кичевски
† НАУМ, Митрополит Струмички
† АГАТАНГЕЛ, Митрополит Повардарски
† МЕТОДИЈ, Митрополит Американско-канадски
† ПИМЕН, Митрополит Европски
† ИЛАРИОН, Митрополит Брегалнички
† ГОРАЗД, Поранешен Митрополит Европски
† КЛИМЕНТ, Епископ Хераклејски  

На Воскресение Христово - Велигден,
2009 Лето Господово