07.07. 2009 год.- храм на св. Јован Крстител, Скопје

Во петтата  недела по Педесетницана, на  денот кога Светата Црква го слави споменот на Раѓањето на Свети Јован Предвесник и Крстител Господов  ,  Неговото Блаженсво Архиепископот Охридски и Македонски г.г. Стефан, во сослужение на свештенство од храмот посветен на св. Јован Крстител (во скопската населба Капиштец),  отслужи Божествена Литургија. На Литругијата многубројниот верен  народ се причести со Светите Христови Тајни.

 Светиот Архиерејски Синод на  МПЦ го одликува протојереј д-р Ацо Гиревски од Скопската православна епархија со право на носење на Граден Крст. Денес, на празникот на Раѓањето на св. Јован Крстител, Архиепископот  г. г. Стефан, обраќајќи се со пригодно слово до  Деканот на Богословскиот факултет, Проф.д-р Гиревски, ги посочи неговите   извонредни  духовни и пастирски резултати во манстирската црква на Светителот, како и залагањата на  Богословскиот факултет. Дарувајќи го со сребрен крст, му посака и понатану достоинствено, впрочем како и сите ние,  да го носи Крстот Христов.

 При тоа, отец Ацо ја произнесе беседата на благодарноста:

БЛАГОДАРНОСТ

Се радувам што ова одликување ми се додели во храмот каде што се вградив, и пред парохијаните кои најногу ги знам и тие мене, исто така. Крст на градите носат архиереите, архимандритите и одликувани свештеници - ставрофори, привилегија со која денес се причести и мојата смиреност (2 Петр 1,4).
Искрена благодарност на Светиот архиерејски синод на Македонската православна црква и посебно на Неговото бл. Архиепископот, г.г. Стефан, преку чија десница го примив чесниот крст Господов, и со тоа ме удостои транспарентно да учествувам во славата Господова (Јн 12,26).
Знаете, крстот претставува своевиден медиум. Преку носењето на крстот се пренесува учењето на христијанството. Крстот потсетува на Христос и на Неговото распетие. Крстот потсетува и на човековиот крст што му е даден од Бога. Од морална гледна точка, со крстот се означува и вкупноста на животните страдања и лишувања и тн., што христијаните се должни да ги носат трпеливо во името на Христа.
Во таа смисла, се присетувам на зборовоите на св. ап. Павле, којшто се молел: „а мене да не ми даде Господ да се фалам со нешто друго, освен со крстот на нашиот Господ Исус Христос, преку Кого за мене светот е распнат, а и јас за светот" (Гал. 6, 14).
Ете, ми се даде можност, од сега па натаму, често да го носам и да се поклонувам на Христовиот свет крст, а со тоа и да мислам на својот крст. Амин!

Капишец, на Иванден 2009.

Посети: {moshits}