Македонци Христијани на дело (26.12.2010)

Peoria, USA - Единствената црковна општина во Соединетите Американски Држави која се уште нема сопствен храм, но е апсолутно и сериозно посветена на ова Богоугодното дело на градење на Божји дом, Ви се обраќа Вам, на сите Македонци насекаде во светот со братски апел за помош. Знаеме дека парите недостасуваат насекаде, но исто знаеме и дека родот Македонски одсекогаш бил сплотен во исконско заедништво и успевал да изгради и остави зад себе големи дела. Овде во Аризона, се чувствуваме можеби најдалеку од родната Македонија. О вде не е Торонто, не е Чикаго, не е Њујорк. Овде сме малкумина. Се бориме секојдневно да тргнеме што е можно повеќе средства за градбата на Македонскиот Храм Божји. Помош малку, дури и воопшто ја нема. Напатем се чувствуваме како заборавени. Но тоа не не поколебува во надежта дека еден ден ќе го издигнеме Божјиот Крст над оваа сурова Аризонска пустина во сведоштво на Македонскиот непокор и битие.

Браќа, Сестри, Македонци. Сега е време да ни помогнете. Одделете малку време и средства за да го подигнеме заеднички овој наш и Ваш Македонски Православен Храм, ова сведоштво наше. Секоја година, секој од нас подарува нешто некому. Помага на некаков начин. Тоа е Христијански и човечки. На нашиот Храм сега му треба вашата помош. Со средствата кои ќе ги донирате ќе помогнете да се заврши ова Свето дело. Задоволството и душевната благодат од таквото дело ќе Ви бидат балгопријатни и Вам и нам. На сите. Зошто ваквите дела, запаметете, не ги носиме со нас! Ги оставаме да сведочат за нас, долго, долго одкога нас еден ден ќе не нема. Ќе им сведочат на новите поколенија за нашата Вера, нашата добрина и нашите корени.