Зависниците во новиот објект, кој е во градба, ќе мора да живеат од 12 до 18 месеци. Ако случајно некој си замине, кога ќе сака да се врати ќе биде последен на листата на чекање. Во земјите во кои се користи ова лекување има 70 проценти на успешност.

- Сакав да одам во Босна, но далеку ми е и не можам некако да се одлучам. Ама ако има кај нас и ако не е скапо, ќе одам. Тука ќе може и да го гледам син ми - вели Игор.

Престој во комуна е новата можност за лекување, која за неколку месеци ќе им биде достапна на зависниците од дрога и од алкохол. Тогаш, во струмичката епархија на Македонската православна црква треба да почне да работи првата комуна, за која сега се гради објектот во кој ќе живеат болните. Во него ќе може да се лекуваат четириесетина зависници, кои таму треба да престојуваат од 12 до 18 месеци. Тие нема да примаат метадонска терапија, туку ќе се лекуваат по принципите на православна психотерапија.

- Ќе се работи според програми што болните ги активираат во производствени или креативни капацитети. Ќе се трудиме да ги искористиме и поттикнеме нивните потенцијали за да се пронајдат и да се ресоцијализираат. Тоа е најтешко кај зависниците. Нивното време ќе биде целосно пополнето. Ние веќе 14 години работиме на проблемот на зависности и имаме резултати - вели отецот Артемиј од струмичката епархија.

Во комуната ќе може да се вклучат зависници што не примиле дрога 21 ден. Тие или нивните родители ќе треба да потпишат договор дека нема да заминат во одредениот временски период.

- Најдобро е периодот од 21 ден зависниците да го поминат дома под надзор. Кога веќе ќе се приклучат во комуната, ако случајно некој си замине, следниот пат веќе ќе биде последен на листата на чекање. Во земјите во кои се користи ова лекување има 70 проценти на успешност - додава отец Артемиј.

Тој вели дека за четириесетина дена ќе заврши градбата на објектот, а оптимистичките варијанти се дека комуната може да почне да работи од октомври.

- Но има друг проблем што треба да се реши, ако сакаме системско решение на зависностите. Државата би требало да покрива дел од лекувањето. Инаку во комуната лекувањето ќе треба да се плаќа, но цената нема да биде висока. Разговараме за околу 200 евра месечно - вели нашиот соговорник.

Епархијата за лекувањето во комуни учи од Полска, Чешка, Америка, Босна и Херцеговина. Во некои од овие земји комуните успешно работат над 15 години.

- Во Италија постојат комуни со по над 35.000 луѓе. Луѓето доаѓаат, се лекуваат и не сакаат да си заминат. Формираат како села и градови во нејзините рамки, а се дружат и меѓусебе - вели отецот Артемиј.

Агресивни мерки, како и тепање на зависниците со кое во црковни заедници беа лекувани во соседна Србија, кај нас нема да се користат.

- Не, тоа не е во ред, ниту пак е христијански. Тоа никако нема да се применува - додава нашиот соговорник.

Македонија троши „метадон“ колку половина Балкан

За лекување на зависниците од дрога Македонија троши „метадон“ колку половина Балкан. Ова го истакна фондацијата „Марита“, која се занимава со реализација на програма за превенција од дрога што се спроведува низ училиштата и младинските центри низ земјава.

- Во 2006 година во земјава се потрошиле околу 27.000 грама „метадон“, додека во наредната 2007 година ова количество тројно се зголемило. Тоа е повеќе од вкупната побарувачка на Бугарија, Србија, Албанија и Босна и Херцеговина заедно - велат од „Марита“.

Употребата на метадон при лекувањето на хероинската зависност често предизвикува поделени мислења околу нејзината ефикасност.

- Тој треба да се користи само како замена за физичката криза, како терапија што би траела до 21 ден, а не да се користи за стагнација на зависниците. Во Македонија честа практика е метадонската терапија да трае и со години - изјави извршниот директор на „Марита“, Стевче Дечев.

Невладиниот сектор предупредува дека во земјава има повеќе од 30.000 зависници од дрога. Со текот на годините паѓа и граничната возраст на зависници, па така најмладиот регистриран зависник има само 12 години.

„Марита“, која е норвешка фондација и е поддржана од норвешката и швајцарската амбасада, со оваа проблематика се занимава од 2003 година. Фондацијата изминатиов период наидува на проблеми во вршење на дејноста, поради игнорирањето на реалниот проблем со дрогата и недоволната ангажираност и поддршка од власта.

- Институциите не се ангажираат докрај да се спроведуваат програмите, кои се покажуваат успешни во лекувањето - велат од фондацијата.   
   
Автор: Наташа Бошковска  - Нова Македонија