Струшките вечери да останат мултијазични
На фестивалот се зборува на јазици од сите светски меридијани - апсурдно е да се бара тој да биде двојазичен,вели писателотПетре Бакевски
Апсурдно е да биде двојазичен фестивалот Струшките вечери на поезијата, кога речиси пет децении се залага за повеќејазичност, за спојување на поети од целиот свет кои создаваат дела на разни јазици, велат наши писатели. Тие реагираат откако Џеми Хајредини, член на неодамна именуваниот Управен одбор на фестивалот, побара СВП да се одржуваат на македонски и на албански јазик.
Писателот Петре Бакевски вели дека е нелогично за најголемиот европски меѓународен поетски фестивал да се бара двојазичност, бидејќи така фестивалот ќе го изгуби својот интеркултурен сјај.
- Ако во изминатите пет децении создадовме нешто горделиво, нешто што го распославме преку сите меридијани, тоа се Струшките вечери на поезијата. Струга е поим за културно спојување во целиот свет. Тоа е постигнато преку контактите на сите јазици што се случуваат на фестивалот. Поезијата не познава еден или два јазика. Таа е светска. Затоа авторите своите творби ги читаат изворно на јазикот на кој тие се напишани. Идејата за интеркултурна соработка СВП ја почнаа многу одамна. Обидот сето тоа да се смали, да се сведе на два јазика, е пазарење „на ситно“ со кое фестивалот ќе биде набиен во агол во време на обезличување на културниот идентитет - вели Бакевски. Академик Луан Старова апелира во организацијата на фестивалот да се вклучи Советот на Струшките вечери што беше составен пред три години. Тој смета дека на тој начин ќе се избегнат сите проблеми со кои сега се соочува СВП.
- Ова се само споредни и измислени проблеми што само им штетат на Струшките вечери. Во овие моменти е најдобро да му се даде моќ на Советот за да го поведе фестивалот, зашто во тоа тело членуваат автори кои Струшките вечери ги водеа во нивните златни денови. СВП е манифестација на сите и во себе носи обединувачки, а не разединувачки дух - вели Старова. Поетот Михаил Ренџов смета дека величината на СВП е во тоа што постои можност да се чуе творештво и на јазици што ретко се слушаат кај нас. Да се сведе сето тоа на некаква двојазичност, вели Ренџов, е неприфатливо за ниту еден творец што верува во идејата за јазично поврзување на народите и културите од разни меридијани. Струшките вечери со својата полифонија од јазици се како една Вавилонска кула. Убавината на фестивалот е што на едно место можат да се чујат и арапски, украински, шпански јазик како белези на нациите во светот денес - вели Ренџов.Академик Катица Ќулафкова е категорична дека фестивалот е светски, а не локален. Затоа Струга може да си направи своја поетска манифестација, но тоа не може да биде СВП.
- Не треба да се дозволи двојазичност. Тој фестивал треба да биде настрана од политичките превирања и да си премине во рацете на Друштвото на писателите на Македонија - вели Ќулафкова и додава дека на фестивалот треба да му се даде повеќе внимание за промоција на македонскиот јазик и творештвото на нашите автори.
Од Министерството за култура, кои го назначуваат раководството на фестивалот, се категорични дека ќе остане досегашниот концепт на спојување на поети од различни јазични средини од светот.
- Ќе направиме се' за фестивалот да не изгуби ништо од својата величина што ја гради речиси пет децении. Тој во светската култура денес е познат како фестивал што по концептот на повеќејазичност спојува автори од целиот свет. Треба да се задржи концептот на голема поетска манифестација. Не сме тесногради за да ја сведеме повеќејазичноста на само два јазика. Во текот на Струшките вечери, како и досега, треба да се зборува на сите светски јазици зашто на тој начин се креираат културните мостови, кои се основна замисла на фестивалот - велат од ресорното министерство.
Независно од идејата за двојазичност, од Дирекцијата на фестивалот велат дека деновиве забрзано работат на подготовките за избор на нов лауреат на Струшките вечери.
Илјаз Османи нов претседател на Управниот одбор на СВП
Илјаз Османи, поет кој работи како наставник по албански јазик е назначен за нов претседател на Управниот одбор на Струшките вечери на поезијата. Тој ќе дојде на местото на поетесата Пунторие Муча-Зиба, која пред само една недела беше поставена на челната позиција во Одборот. Муча-Зиба е сменета од позицијата зашто една недела по именувањето не свика состанок на членовите на Управниот одбор, кои треба да изберат добитник на наградата „Златен венец“ и да ја подготват програмата за фестивалот. Во мината недела таа беше во приватна посета на САД. Во Одборот остануваат да членуваат авторите Љавдрим Елмази и Бранко Цветковски. Од локалната самоуправа од Струга во Одборот ќе членуваат Џеми Хајредини и поетот Разме Кумбаровски.
Тоше Огњанов
