И Господ на тезга
Македонија станува крстосница на шверцот со христијански реликвии што потекнуваат од Русија, Романија и од Украина, а кај нас се внесуваат од Грција, предупредуваат достоинствениците на МПЦ

Македонија станува земја-крстосница на шверцот со икони и други христијански реликвии што најчесто потекнуваат од Русија и од Украина, а кај нас се внесуваат од Грција, предупредуваат достоинствениците на Македонската православна црква. Неодамнешното запленување на 183 икони што македонската царина ги откри во камион што транзитирал од Грција кон Србија, како и пред еден месец кога спречи шверц на икони на граничниот премин Меџитлија, потврдуваат дека преку земјава транзитираат или остануваат верски предмети со дискутабилно потекло. Во Царината изјавија дека се' уште не е решена судбината на запленетите 183 икони. Најверојатно Владата ќе донесе одлука со која тие ќе се подарат на некои институции.

загрозена автентичност

Поголеми и помали икони со налепници од слики на светци со натписи на руски, бугарски, грчки или на српски јазик се' почесто може да се најдат и по верските храмови на МПЦ. Крстови во најразлични форми, кандилца, приврзоци... се само дел од асортиманот на верските реликвии кои до верниците што ги купуваат стигнуваат по неколкукратно зголемена цена. Владиците на МПЦ предупредуваат дека напливот на ваквата стока ја потиснува и ја загрозува автентичноста на христијанството во Македонија.По продажните места се' повеќе ги среќаваме руските или византиските крстови. По своите карактеристики тие се разликуваат од крстовите што по традиција се користат на македонска почва. Луѓето што сакаат во своите домови да имаат икони, кандилца, крстови ги купуваат и заради цената која им е донекаде прифатлива. Појавата има и масовни карактеристики. Точно е дека христијанството има универзална димензија, но националните специфичности се негуваат - вели еден владика на МПЦ.Свештеникот Стојан Пајковски од манастирот „Света Троица“ вели дека последниве години добро е разработен пазарот со црковни реликвии од Русија и Романија.Во овие две големи христијански земји постојат големи капацитети, во манастирите или во индустриски погони, кои произведуваат големи количества верски предмети. Таму, на пример, една икона се набавува по десет евра, а потоа нејзината цена достигнува и до сто евра. Нашите луѓе не се разбираат толку за да ја проценат вистинската вредност на таквите предмети. Со таква трговија не само што се ограбуваат луѓето туку и' се нанесува голема штета на автентичноста на македонската иконографија - вели Пајковски. Тој објаснува дека ваквите предмети доаѓаат до свештениците откако ќе им ги понудат најразлични „трговци“. Свештеникот ќе ги земе заради тоа што често има потреба да им даде нешто на верниците. Како црква, сепак, би требале да имаме наши оригинални предмети, а не да користиме туѓи и неавтентични за нашиот простор - потенцира Стојан Пајковски.Скопјанецот Зоран Георгиевски вели дека помалите икони ги купува првенствено поради нивната цена: Неодамна бев во една скопска црква и на тезгата во нејзиниот двор купив мала икона за 100 денари. Подоцна, видов дека на нејзината заднина има текст на руски јазик. Како христијанин, не ми пречи, но мислам дека треба да имаме такви работи и на македонски јазик.

кусок работилници

Во МПЦ наведуваат дека до скоро Грција била главната земја од која во Македонија се увезувале верските предмети. Свештениците таму набавувале облека, панагии, свеќници, икони, кандила.Сега цените во Грција се прескапи за нас и очигледно е дека предметите доаѓаат од други земји каде што се купуваат евтино. Ние не можеме да забрануваме таквите предмети да се продаваат, но јасно е колкава вредност тие може да имаат - вели дебарско-кичевскиот митрополит на МПЦ Тимотеј.Митрополитот Петар смета дека МПЦ во последниве години од сопствени ликовни работилници по манастирите обезбедува доволно оригинални икони.Нема доволно само помали и поголеми икони кои се користат во поширока употреба од граѓаните што сакат да ги имаат во својот дом. Кај нас постои производство на помали икони со постапка на „каширање“, односно, со лепење хартиени слики од светци на дрвена подлога. Но, таа хартија се набавува од Русија или од други земји - вели тој.МПЦ нема специјализирана работилница во која би се правеле поситни верски реликвии. Ние треба да создадеме таква работилница бидејќи без неа доаѓаме во незавидна состојба што ја нарушува нашата христијанска автентичност - велат во МПЦ.

Грчки кандила за скопската „Пресвета Богородица“

Канидалата, свеќниците, крстовите и другите црковни предмети неопходни за неодамнешното осветување на скопската црква „Пресвета Богородица“ морале да бидат итно увезени од Грција зашто не можеле да се најдат во Македонија. Истата ситуација се случила и при осветувањето на црквата „Свети Пантелејмон“ на охридски Плаошник.

Бранко Горгевски-Дневник