До: Средствата за јавно информирање

Почитувани,

Денес, 29. 12. 2010 година, се одржа средба помеѓу поглаварите на верските заедници во духот на долговековната традиција на меѓурелигиска, меѓуетничка и меѓуцивилизациска толеранција, проследена со заедничко живеење и разбирање.

На предпразничнава средба особено внимание се посвети на темата за бракот и семејните вредности, кои се заеднички за сите верски заедници во нашето општество.

Семејството, мајчинството, татковството и грижата за децата претставуваат највисока морална обврска. Бракот, пак, како заединца на еден маж и една жена, преку кој се формира семејството, соочен е со предизвиците за негово редефинирање, спротивно на Божјите, односно природните закони.

Загрижени од наводните демократски дебати и принципи, ние, претставниците на црквите, верските заедници и религиозни групи во Република Македонија, сметаме дека е потребно бракот како институција да биде афирмиран и уставно дефиниран како заедница на еден маж и една жена.

Од аспект на социјална грижа, пак, предлагаме децата без родители да можат да бидат посвојувани само и единствено од страна на лица од различен пол, кои се во законски брак, како и од страна на самохран родител.

Затоа, на оваа средба се донесе заеднички став, да се покрене иницијатива за измени и дополнувања на Член 40 од Уставот на Република Македонија.

Апелираме до сите граѓани на Република Македонија, како и до пратениците во Собранието на Република Македонија, за широка поддршка на оваа иницијатива, а со цел за афирмација на семејните вредности во нашето демократско општество и вредностите кои заеднички со векови ги споделуваме.

1.  МАКЕДОНСКА ПРАВОСЛАВНА ЦРКВА-

ОХРИДСКА АРХИЕПИСКОПИЈА

Архиепископ Охридски и македонски, Стефан

2. ИСЛАМСКА ВЕРСКА ЗАЕДНИЦА ВО РМ

Реис Ул Улема, Хаџи Ефенди Сулејман Реџепи

3. КАТОЛИЧКА ЦРКВА ВО РМ

Бискуп Скопски и Апостолски Егзарх д-р Киро Стојанов

4. ЕВАНГЕЛСКО-МЕТОДИСТИЧКА ЦРКВА ВО РМ

Проповедник, г. Михаил Цеков

5. ЕВРЕЈСКА ЗАЕДНИЦА ВО РМ

Госпоѓа Бјанка Суботиќ, претседател

 Извор: Скопска епархија