Не сакам од вас да ја сокријам причината поради која Господ ја дава Својата благодат. Нема многу да пишувам, само ве молам – сакајте се едни со други и ќе ја видите Божјата милост. Да ги засакаме ближните, така и Господ нас ќе нѐ засака. Зар мислите дека Господ ве сака ако вие некого гледате попреку. О, не. Поголема е веројатноста дека ве сакаат ѓаволите, бидејќи сте станале нивни слуги. Но, не двоумете се. Покајте се и измолете од Господ сила за да ги сакате своите браќа, и ќе почувствувате мир во душата.
Со сите сили барајте од Господ смирение и братска љубов, бидејќи поради неа Господ ја дава Својата благодат. Самите испитајте – еден ден молете од Бога љубов кон браќата, а друг живејте без љубов, па ќе ја видите разликата. Духовните плодови на љубовта се јасни: мир и радост во душата. Тогаш сѐ ќе ви биде блиско и мило, и ќе пролевате многу солзи за ближните и за сите созданија. Често, за еден љубезен поздрав, човекот во душата чувствува некоја радосна промена. И спротивно, за еден поглед со презир се губи благодатта и Божјата љубов. Тогаш што поскоро покај се за повторно да се врати мирот во твојата душа.
Блажена е душата која Го засакала Господ и од Него се научила на смирение. Господ ја сака смирената душа која цврсто се надева на Него. Таа секој миг ја чувствува Неговата милост. Дури и кога разговара со луѓето, таа е обземена од љубовта кон Господ. Преку долгите борби со злите духови таа го засакала смирението повеќе од сѐ и не им дозволува на демоните да ја избркаат љубовта кон ближните од неа.
Ако со сите сили ги сакаме ближните и ја смируваме душата, победата ќе биде наша, затоа што Господ, пред сѐ, ја дава Својата благодат поради љубовта кон ближните.
Преподобен Силуан Светогорец
Март 2023 лето Господово
ФБ на Оливера Соколова Македонска
