ТРОПАРИ НА СВЕТИТЕЛИТЕ И ПРАЗНИЦИТЕ

Тропар на светиот
Божји пророк Јона
22 септември / 5 октомври

Јона пророкот Божји денес го прославуваме о, верни,
преку него ја видовме милоста Негова,
Оној Kој човекот го создаде, Тој & го љуби.
Kако дете Јона Бог го воскресна,
како возрасен во познание беше приведен,
о, Христе на Твоето триденевно во земја престојување.
Пророче ти кој стана труба која на покајание повикува,
моли се своите гревови да ги препознаеме,
и со пост и молитва кон Христа да припаднеме.

 
Извор МПЦ – ОА
Манастир свети Јован Претеча Слепче

  Тропар на светиот
Христов маченик
Фока градинар Синопски
22 септември / 5 октомври

Плодови на ревноста твоја принесе пред Господа,
а Он плодови на љубов во тебе умножи,
духовни бисери кои на дар доби,
на дар ги раздаде: радост, мир, трпение,
добрина, милосрдие, кротост, воздржување,
о, Фоко Божји угодниче.
Моли се за нас морепловецу и твоите молитви
нека нѐ водат, со Бога помирени во Царството Небесно.

 
Извор МПЦ – ОА
Манастир свети Јован Претеча Слепче


Тропар на светиот
Христов свештеномаченик
Фока чудотворец
епископ Синопски
22 септември / 5 октомври

Го подготви срцето твое, Фоко
свештеномачениче за Господа, и ниедна стихија земна
не ја допре верата која ти на Него ја положи,
ниедно мудрување човечко ревноста не ја намали,
венеценосецу на кого Небото видливо рака положи.
Радувај се и за нас моли се благодатен Божји угодниче.

 
Извор МПЦ – ОА
Манастир свети Јован Претеча Слепче




Тропар на преподобниот
Христов презвитер
Јона Палестински
22 септември / 5 октомври

Светило запалено пред Господа,
дрво плодородно кое плодови дава навреме,
крошно од чии молитви и солзни капки
денес се напојуваме, Јоно Божји угодниче,
испрати утробата твоја при Христа рожба
достојнославна и не се посрами љубовта
која нозе Господови целива, туку и денес
за нас моли се, пред Спасителот во вечноста.

 
*татко на преподобните Теодор и Теофан нацртани

Извор МПЦ – ОА
Манастир свети Јован Претеча Слепче


Тропар на преподобниот отец
Козма Зографски
22 септември / 5 октомври

Блажен си ти Козмо свети испосниче,
кој за водител ја имаше Пресвета Богомајка,
а за учител Христос Спасителот.
Радувај се и за нас моли се преподобен оче,
кој срце за Бога отвори, а солзи за наше
спасение приклони, да бидеме
помилувани просејќи ги пред Господа
твоите свети молитви.

 
Извор МПЦ – ОА
Манастир свети Јован Претеча Слепче


Тропар на светиот
поранешен цариник Петар
22 септември / 5 октомври

Благословен е милосрдниот Бог о, Петре
свети покајниче, милоста Негова е
 од век до век за оние кои на Него се надеваат,
полагајќи ја душата нивна заради Царството Небесно.
Радувај се светителу, радувај се милосрден
Христов робу и за нас моли се,
трпението и смирението твое,
да бидат залог за нашето спасение.

 
Извор МПЦ – ОА
Манастир свети Јован Претеча Слепче



Тропар на светиот
епископ Христов
Софрониј Вратчански
22 септември / 5 октомври

Смирението твое Софроние епископе свети,
мноштво дарови донесе во градината на душата твоја,
а ти на Бога благодарејќи срце отвори,
за поука исповедничка, на народ кој
жеден стои пред ликот твој од Христа осветен.
Радувај се и нас спомни нѐ пред Оној, Кој власт има
списоци грешни да искине и во мирот Свој нѐ приведе.

Извор МПЦ – ОА
Манастир Св. Јован Претеча Слепче

Од Верскиот календар на МПЦ (05.10.2024)

ТРОПАР

Тропар (грч. τροπάριον, цсл. тропа́рь) е кратка црковна молитвена песна, настаната во доцниот стадиум на химнографијата. Тропарот ја содржи суштината на празникот за кој е напишан и во кој се прославува светителот; во Канонот, тропарот следи после ирмосот. Често се однесува и на аполитикион (грч. απολυτίκιον), или отпустителна химна преку која се опишува главната тема на богослужењето на денот, а со која се завршува Вечерната богослужба.

Богородичен (теотокион) е посебен вид на тропар, кој е посветен на Пресвета Богородица. Помали варијации во Богородичниот водат кон Крстобогородичен (ставротеотокион), посебен вид на тропар посветен на страдањето на Пресвета при распнувањето на Христос на Крстот, и како таков најчесто се користи во среда и петок, денови кога Црквата се сеќава на чесниот Крст Господов.

Понекогаш тропарот се користи како рефрен помеѓу читање на стихирите.од Псалмите, иако примарната функција во тој случај ја имаат стихирите.

Тропарник се нарекува една засебна целина во книга со тропари и кондаци, за секој ден на Црковната литургиска година.

ПреминПортал

2024 лето Господово

 Од Верскиот календар:

Светиот пророк Јона

Живееше повеќе од 800 години пред Христа. Во неговото житие се вели дека тој бил синот на онаа вдовица во Сарепта Сидонска на којашто пророкот Илија ѝ го воскресна синот од мртвите. Со своето тридневно пребивање во утробата на китот Св. Јона е предобраз на тридневното пребивање на Христос во гробот, а со неговото спасение - го изобрази Воскресението на Господ од мртвите. Другото запишано за овој прекрасен пророк треба да се прочита во Книгата на пророкот Јона (Стариот Завет).