Депресијата ги погодува дури и светителите

svTIHon

Навикнати сме на иконите да ги гледаме спокојните насмевки на подвижниците. Но еден од најдлабоките интелектуалци на Црквата со години не можел да ја напушти својата соба поради парализирачка депресија.

Во 1767 година, православниот епископ Тихон Воронежски направил чекор што го шокирал целиот Свет Синод на Руската Црква. Брилијантен администратор и длабок мислител, токму на врвот од својата епископска служба, побарал да биде разрешен и повлечен од должност. Имаше само четириесет и три години – возраст кога црковните великодостојници обично дури почнуваат да стекнуваат влијание и авторитет.

Во официјалните извештаи стоеле суви формулации: тежок нервен растрој, хронична несоница, постојана вртоглавица и целосна физичка исцрпеност. Долго време властите во Санкт Петербург се двоумеле да го ослободат од служба својот вреден архијереј, но свети Тихон буквално молел да му биде дозволено да се повлече во осаменост. Така се населил во Задонск.

Она што во XIX век срамежливо се нарекувало „искушение на меланхолијата“, денес пастирите и лекарите без двоумење би го нарекле тежок облик на клиничка депресија.

Тоа не била поетска или возвишена тага, каква што често среќаваме во романите. Тоа била тешка, разорна состојба што ја зафаќала и душата и телото. Личните помошници на светителот, Василиј Чеботарев и Иван Јефимов, оставиле искрени сведоштва за тој период.

Имало недели кога големиот светител не можел да се натера ни прагот од својата соба да го премине. Се заклучувал, одбивал храна, со часови плачел на подот и страдал од напади на паника. Го обзема чувство на потполна оставеност од Бога. Понекогаш таа внатрешна мака станувала толку неподнослива што старецот од Задонск, со скршено срце, Го молел Бога само за едно – за смрт.

Болест или крст?

Во нашата црковна средина сè уште постои еден суров и длабоко вкоренет стереотип. Ако некој се чувствува лошо, ако ја изгубил животната сила и не може да стане од кревет, веднаш му се поставува дијагноза: „Не се молиш доволно, тоа е грев на униние, покај се.“ Така човекот уште подлабоко ја потиснува својата болка, задушувајќи се под тежината на тие зборови.

Но тука мора да се направи јасна разлика. Едно е каприциозното и себично незадоволство од животот, кога човек има сè, но му е здодевно и копнее по внимание. Тоа навистина е страст против која треба да се бориме. Сосема друго е кога психата ќе се скрши под тежината на огромен стрес.

Длабоката меланхолија на свети Тихон не била недостаток на вера, туку болест. Тоа бил тежок и крвав крст што Бог му допуштил на Својот праведник да го носи до самиот крај на животот.

Да се обвинува човек за депресија во време на војна или катастрофа е исто толку бесмислено колку да се обвинува за туберкулоза или скршена нога. Бог не се оддалечува од нас кога ќе ни снема сили да се смееме.

Методот на мрзливиот коњ

Како преживеал во таа непробојна темнина?

Свети Тихон сфатил дека кога чувствата се мртви, бесмислено е човек да бара духовен занес или радост во себе. А да се чека сè „само од себе да помине“ е опасно. Затоа воспоставил строга дисциплина.

Во писмата до своите духовни чеда, тој ја споредува душата погодена од униние со мрзлив коњ.

„Од твоето писмо гледам дека те обзело униние“, пишува светителот. „Тоа е жестока страст со која христијаните што сакаат спасение мора ревносно да се борат... Ти го советувам следново: принудувај се себеси на молитва и на секое добро дело, дури и кога не ти се сака. Како што луѓето го поттикнуваат мрзливиот коњ да оди или да трча, така и ние треба да се принудуваме на секое добро дело, а особено на молитва. Кога Господ ќе го види тој труд и таа ревност, ќе ти даде желба и усрдност.

“Кога повторно ќе го обземела меланхолијата, свети Тихон земал секира и одел во манастирскиот двор да цепи дрва.

Со вкочането и безживотно срце, облеан во пот, носел тешки кофи вода, копал во градината и газел по калливите шумски патеки. Буквално ја принудувал крвта да се движи, а умот да се одврати од внатрешните демони преку едноставна и тешка работа.

Освен тоа, и во најдлабоките мигови на своето страдање, продолжувал да ја дели својата скромна епископска пензија до последниот денар. Ги бранел селаните од неправдите на земјопоседниците, примал поклоници и ги лекувал туѓите болки токму тогаш кога неговата сопствена душа била растргната. Дејствувал и кога не сакал, принудувајќи се да ја надмине својата немоќ.

Уметноста на малите чекори

Искуството на задонскиот старец е силен потсетник за сите нас. Христијанството никогаш не било фабрика за присилни насмевки ниту евтина психотерапија. Нашата вера е подготвеност да останеме луѓе и да продолжиме напред дури и кога ништо не чувствуваме.

Кога светот околу нас се руши со заглушувачки крик, а нашата психа не може да ја опфати големината на трагедијата, нема потреба да бараме од себе големи духовни подвизи.

Не обидувајте се сега да го спасувате човештвото или да доживеете голема пасхална радост ако сте изгорени и исцрпени.Рецептот на „мрзливиот коњ“ спасува животи.

Понекогаш најголемиот духовен подвиг во текот на денот е едноставно да се натераш да станеш од кревет. Да си налееш чаша вода. Механички, само со усните, да го изговориш „Оче наш“, без да бараш веднаш солзи или умиление во срцето. Да поправиш брава кај постар сосед, да ја средиш својата соба, да направиш едно мало добро дело за некој близок.

Научи ја уметноста на малите чекори.Имаме право да бидеме уморни и слаби. Бог не очекува од нас совршена фасада. И можеби токму во мигот кога ќе ги стиснеме тупаниците и тивко ќе прошепотиме: „Господи, повеќе ништо не чувствувам“, на прагот незабележливо ќе се појави Оној Кој цел живот внимателно ја водел нашата ранета и изморена душа – како коњ за узда.

Подготвил С.Стефковски / orthodoxhr.wordpress.com

https://orthodoxhr.wordpress.com/

svJovnZltousti