ПРОМОЦИЈА НА РОМАНОТ „НА ПАТ СО ВРЕМЕТО“ ОД ПЕТРЕ НАКОВСКИ ВО КУМАНОВО
 
17 април 2011 година, Куманово, Македонија (СМК) - Во организација на Сојузот на Македонците од Егејот МАКЕДОН и Здружението на Македонците од Егејскиот дел на Македонија „Наше огниште“ од Куманово, а пред бројни почитувачи на пишаниот збор и на македонската голгота во Егејскиот дел на Македонија, минатата недела, во Домот на културата „Трајко Прокопиев“ во Куманово се одржа промоција на романот „На пат со времето“ на амбасадорот Петре Наковски. Во романот, авторот ја опишува голготата на насилно прогонетите Македонци за време на Граѓанската војна во Грција во 1949 година, која лично ја доживеал. Промотор на романот беше претседателот на Светскиот Македонски Конгрес Тодор Петров.
 
Петре Наковски е романсиер и преведувач. Роден е на 17 јули 1937 година во село Крчишта, Костурско, во Егејскиот дел на Македонија. Педагошки ликеј завршил во Полска, а Филолошки факултет во Македонија. Докторирал на Институтот за политички науки на Вроцлавскиот универзитет во Полска. Бил новинар во весниците „Вечер“ и „Нова Македонија“, а работел во Министерството за надворешни работи. Петре Наковски е прв амбасадор на Македонија како самостојна и суверена држава во Полска. Oд 1989 година член е на Друштвото на писателите на Македонија. Автор е на повеќе раскази објавени во македонската периодика, како и на романите: „Постела за чемерните“ издаден во 1985 година, „И каменот е земја“ издаден во 1988 година, „Големата удолница“ издаден во 2003 година, „Големата измама“ издаден во 2007 година и романот „На пат во времето“. Значаен е неговиот докторски труд „Македонските деца во Полска 1948-1968 година“ објавен во 1985 година и секако капиталниот труд за насилно прогонетите Македонци од Егејскиот дел на Македонија во Полска од 1948 до 1975 година како заедничко издание на државните архиви на Македонија и Полска, на македонски и полски јазик, со избор на 227 документи од приватната архива на авторот, збирката документи „Македонските бегалци во Полска 1948-1975 година“ објавен 2008 година.
 
Од полски на македонски има преведено и објавено 40 литературни дела и поголем број на песни и раскази од македонски автори, како и драмата „Црнила“ на Коле Чашуле. Добитник е на наградите „Златно перо“ и „Кирил Пејчивиќ“ за преведувачки опус, наградата на полските автори, а одликуван е со Златен медал за заслуги за полската култура и Златен орден на командоријата во Полска.
 
На промоцијата на романот „На пат со времето“, генералниот секретар на Сојузот на Македонците од Егејот МАКЕДОН Александар Ѓорѓиев го претстави Сојузот МАКЕДОН, неговата организација, цели и задачи, печатеното гласило на Сојузот МАКЕДОН „Глас на Егејците“ и електронското издание на интернет страницата www.makedonmagazin.mk.