НА ДРЖАВНИОТ УНИВЕРЗИТЕТ ВО САНКТ ПЕТЕРБУРГ

Истражувањето за Каменот од Розета пред научната елита во Русија

Академик Томе Бошевски и проф. Аристотел Тентов во Русија, пред светски еминентни лингвисти, ќе бараат научна верификација на тврдењето дека средниот текст од египетскиот артефакт е напишан на јазикот на античките Македонци

Истражувањето на египетскиот артефакт Каменот од Розета на академик Томе Бошевски и професор Аристотел Тентов од 12 до 14 мај ќе биде претставено на престижниот конгрес насловен како "Докирилската словенска писменост и дохристијанската словенска култура", кој ќе се одржува на Државниот универзитет во Санкт Петербург во Русија.

Македонските истражувачи во Русија одат на директна покана на организаторите, а ќе се претстават со труд на тема "Каменот од Розета, споменик на писменоста на древните Македонци и Словените". На конгресот ќе бидат претставени над 80 реферети на светски познати лингвисти, академици, научници, професори. Оваа покана дојде благодарение на академикот во Руската академија на науки и уметности Валериј Чудинов, кој пред две години се запозна со истражувањето на Бошевски и Тентов. Чудинов има свои коментари за нивната работа, а трудот го преведе и на руски јазик.

-Мислам дека имаме што да кажеме. Со самото тоа што добивме директна покана, очигледна е желбата од нивна страна да не чујат, вели професорот на Електротехничкиот факултет, Аристотел Тентов, кој заедно со Бошевски во Русија ќе ја претстават методологијата што ја користеа при истражувањето на средниот текст од египетскиот артефакт Каменот од Розета, чие истражување беше финансирано од МАНУ.

-Нашите сознанија говорат дека се повеќе факти докажуваат дека сме во право кога тврдиме дека јазикот на тие древни Македонци ни е разбирлив, вели Тентов и додава дека истражувањето врз артефактот продолжува.

Тој додава дека првичните оценки што доаѓаат однадвор, а се однесуваат на нивниот труд се позитивни.
-Има и нови моменти во смисла на тоа дека во текстот што го анализираме наоѓаме како треба да биде поставена и аранжирана околината околу Каменот од Розета. Аранжманот кој овде го добиваме како резултат на нашите исчитувања се поклопува со археолошките истражувања, односно со откриените копии на Каменот. Добро опишана е и околината околу Каменот, што содржела, а тоа е добро опишано во средниот текст.

Во делот со древногрчкиот текст тоа го нема, вели Тентов. Тој е оптимист дека истражувањето наскоро ќе добие широка поддршка. Професорот објаснува дека веќе има и приватни фирми кои го помагаат истражувањето. Тентов како куриозитет го објаснува и најновото сознание во кое констатирале дека трите текста, владетелот ги напишал на различен пристап, односно на различен начин им се обраќал на различните народи. Такво демократско право и ден-денеска владетелите, државниците не употребуваат. Владетелот во текстовите се обраќа на начин на кој што секоја заедница би очекувала да им се обрати, почитувајќи ги нивните религиски и социјални обичаи и верувања.

Македонското истражување за Каменот од Розета е претставено и на интернет и во последниве три месеци Тентов вели дека имале над 16.000 посети од сите делови на светот.

Што е Каменот од Розета?
Двајцата научници излегоа со тврдење дека средниот текст од прочуениот артефакт, датиран во 196. година пред Христа, декрет на Птоломеј Петти, тогашен владетел на Египет, е напишан на јазикот на античките Македонци. Во МАНУ, по презентирањето на истражувањето, речиси и да немаше релевантни реакции. На Каменот од Розета кој има импонзантни димензии и е изработен од гранит, напишани се текстови на три различни јазици: хиероглифски, демотски и античкогрчки.

Анита ЈОВАНОСКА -Вечер