Канонизирани светители во 2013 година

Во јануари 2013 г. Украинската Православна Црква ги канонизира свештеномачениците Адриан Вожаков (+1937) и Димитриј Сурмели (+1937). Протоереј Димитриј Сурмели, по потекло грк, е стрелан поради тоа што „под маската на религиозната дејност, извршувал контрареволуционерна агитација“. А протоереј Адриан Вожаков е убиен поради тоа што продолжил да служи Света Литургија и да крштева деца во својот дом, откако бил затворен неговиот храм од страна на болшевиците. Нивниот спомен ќе се слави на денот на нивната прослава – 5-ти јануари.
Во февруари 2013 г. Руската Православна Црква го канонизира преподобен Далмат Исетски (1594-1697). Преподобен Далмат живеел во тешки години на несреќи и сиромаштија. Два пати пред негови очи неговиот манастир бил разрушуван до темел и потоа два пати повторно изграден, а самиот тој бил неколку пати блиску до смртта. До крајот на својот живот останал прост монах, и покрај тоа што бил основач на манастир. Неговиот спомен ќе се чествува на 25 јуни / 8 јули и 24 јуни / 6 август.
Во месец мај 2013 г. Црногорско-приморската митрополија на Српската Православна Црква, во манастирот Цетиње, го канонизира митрополит Петар II Његош (1813-1851). Митрополит Петар од својата 17 годишна возраст е истовремено световен управител на Црна Гора (1830-1851) и Црногорски митрополит. Автор е на многу поеми и стихотворби и од многумина е сметан за највидниот претставник на српската литература. Неговото црковно почитување е одредено на 19-ти мај.
На 11 јули 2013 г. Константинополската Вселенска Патријаршија со синодско решение кон ликот на новомачениците ги причесли и последниот император на Трапезундската империја – Давид Велики Комнин и неговите три деца Василиј, Георгиј и Мануил, и неговиот внук и наследник на тронот – Алексеј, кои маченички пострадаа во Константинопол на 1 ноември 1463 г. Канонизацијата е поврзана со 550 години од нивната маченичка смрт, како и со 560 годишнината од паѓањето на Константинопол (1453 г.) под османлиска власт.
Во месец ноември 2013 г. Вселенската Патријаршија го канонизира старец Порфириј Кавсокаливит, еден од најпочитуваните современи аскети во православниот свет. Бог го прослави со дарот на чудотворството и прозорливоста уште пред неговата смрт. Неговиот спомен се слави на 2-ри декември.
Извор: Кои светци канонизира Православната църква през 2013 г.

Извор: Маран Ата